دہلی کی سڑکوں اور کالونیوں سے لفظ’ہریجن‘کو ہٹا یا جائے گا
نئی دہلی (ایس این بی) : دہلی کی سڑکوں اور کالونیوں کے ناموں سے لفظ ’ہریجن‘ہٹا دیا جائے گا۔ اس کے بجائے ’ڈاکٹر امبیڈکر‘لکھا جائے گا۔ وزیر سماجی بہبود راجندر پال گوتم نے جمعرات کو یہ جانکاری دی۔ انہوں نے کہا کہ اس حوالے سے جلد نوٹیفکیشن جاری کیا جائے گا۔اس موقع پرراجیندر گوتم نے کہا کہ دہلی ملک کی پہلی ریاست ہوگی جس نے لفظ ’ہریجن‘کے استعمال پر پابندی عائد کی ہے۔ انہوں نے کہا کہ بہت سے لوگ کہتے ہیں کہ یہ لفظ نفرت انگیز اور توہین آمیز ہے۔ انہوں نے کہا کہ ایک پارلیمانی کمیٹی نے تجویز دی ہے کہ وزارت سماجی انصاف اور بااختیار بنانے کے تمام محکموں اور ریاستی حکومتوں کو مشورہ دیا گیا ہے کہ وہ ’ہریجن‘کا لفظ استعمال نہ کریں۔ واضح رہے کہ اپریل 2018 میں وزارت نے تمام ریاستوں اور مرکز کے زیرانتظام خطوط سے کہا تھا کہ وہ درج فہرست ذات کے لوگوں سے خطاب کرتے ہوئے ’دلت‘اور ’ہریجن‘الفاظ کے استعمال سے گریز کریں۔ وزارت نے ’شیڈولڈ کاسٹ‘ اور علاقائی زبانوں میں اس کا ترجمہ استعمال کرنے کو کہا تھا۔گوتم نے کہا کہ ہم 2019 سے اس سمت میں کام کر رہے ہیں۔ دہلی ایس سی/ایس ٹی/او بی سی ویلفیئر ڈیپارٹمنٹ نے محکمہ شہری ترقی کو خط لکھ کر اس بات پر زور دیا کہ یہ ایک توہین آمیز اصطلاح ہے اور درج فہرست ذات کے لوگ اسے پسند نہیں کرتے۔ انہوں نے کہا کہ ہم تجویز کرتے ہیں کہ قومی راجدھانی میں سڑکوں اور کالونیوں کے ناموں پر لفظ ’ہریجن‘کو ’ڈاکٹر امبیڈکر‘سے بدل دیا جائے۔ کووڈ-19 وبائی امراض کی وجہ سے یہ عمل ملتوی کر دیا گیا۔ انہوں نے کہا کہ انہوں نے محکمہ قانون کے افسروں سے کہا ہے کہ وہ یہ عمل 10 دن کے اندر مکمل کریں جس کے بعد نوٹیفکیشن جاری کیا جائے گا۔ دہلی میں بہت سی ہریجن بستیاں ہیں جن میں وکاسپوری ، پالم اور کونڈلی شامل ہیں اور یہاں کلکاجی علاقے میں ہریجن کالونی کے نام سے ایک سڑک ہے۔
