مانچسٹر یونائٹیڈ کے اسٹار کھلاڑی لیورل پول کے خلاف نہیں کھیلیں گے میچ
مانچسٹر(ایجنسیاں) :عالمی شہرت یافتہ فٹبالر کرسٹیانو رونالڈو کے جڑواں بچوں میں سے ایک نومولود بیٹا انتقال کرگیا۔بیٹے کی موت سے کرسٹیانو رونالڈو ٹوٹ گئے اورآج رات لیور پول کے خلاف میچ نہیں کھیلیں گے۔جبکہ مانچسٹر یونائٹیڈ سمیت دیگر کلبوں اور کھلاڑیوں نے تعزیت کا اظہار کیا ہے۔ سماجی رابطے کی سائٹ انسٹاگرام پر کرسٹیانو رونالڈو نے لکھا کہ ’انتہائی دکھ کے ساتھ ہمیں یہ بتانا پڑرہا ہے کہ ہمارے نومولود بیٹے کا انتقال ہوگیا ہے‘۔مانچسٹر یونائیٹڈ کے اسٹار فٹبالر نے لکھا کہ ’یہ سب سے بڑا درد ہے جسے کوئی بھی والدین محسوس کر سکتے ہیں، صرف ہماری بچی کی پیدائش ہی ہمیں اس لمحے کو کچھ امید اور خوشی کے ساتھ جینے کی طاقت دے رہی ہے‘۔
رونالڈو نے کہا کہ ہم اس مشکل وقت میں غیرضروری باتوں سے اجتناب کرنے کی درخواست کرتے ہیں اور تمام ماہرانہ دیکھ بھال اور تعاون کے لیے ڈاکٹرز اور نرسز کا شکریہ ادا کرنا چاہتے ہیں۔یاد رہے کہ رونالڈو نے اکتوبر 2021 میں اعلان کیا تھا کہ وہ اپنی 28 سالہ پارٹنر جارجینا روڈریگز کے ساتھ جڑواں بچوں کی توقع کررہے ہیں۔ادھرمانچسٹر یونائیٹڈ نے ایک بیان میں کہا ’’خاندان سب سے اہم ہے اور رونالڈو اس مشکل وقت میں اپنے چاہنے والوں کے ساتھ رہنا چاہتے ہیں۔ ہم خاندان کی رازداری کو برقرار رکھنے کی درخواست کا احترام کرتے ہیں‘‘۔ ادھر لیورل پول کے آفیشیلز اور شیدائیوں نے اینفیلڈ میں ہونے والے میچ کے دوران دو منٹ کی خاموشی اختیار کرنے کا اعلان کیا ہے۔ آج ہی شام لیورپول کی ٹیم اینفیلڈ کے لیے روانہ ہوگی۔ رونالڈو کو دیگر کھلاڑیوں اور کلبوں نے بھی تعزیتی پیغامات ارسال کرکے ان کے ساتھ ہمدردی کا اظہار کیا ہے۔
