لندن (ایجنسیاں) رحیم اسٹرلنگ کے شاندار کھیل کی بدولت انگلینڈ نے بین الاقوامی فرینڈلی فٹ بال میچ میں دس رکنی آئیوری کوسٹ کو 3-0سے روند ڈالا۔ منگل کی دیر رات کھیلے گئے اس میچ میں ٹیم کی کپتانی کرنے والے رحیم اسٹرلنگ نے شاندار کھیل کا مظاہرہ کیا اور نا صرف گول کرنے میں مدد کی بلکہ ٹیم کا دوسرا گول بھی کیا۔ میزبان ٹیم نے میچ کے 30ویں منٹ میں ہی برتری حاصل کرلی جب اولی واٹکنز نے رحیم کے پاس کا فائدہ اٹھاتے ہوئے گیند کو جال کے اندر پہنچا دیا۔ دس منٹ بعد ہی آئیوری کوسٹ کو ایک اور جھٹکا اس وقت لگا جب اس کے کھلاڑی سرج اوریئر کو دوسری مرتبہ زرد کارڈ کے ساتھ سرخ کارڈ دیکھا کر میدان سے باہر کردیا گیا۔ اس کے ساتھ ہی ٹیم دس کھلاڑیوں پر مشتمل ہوگئی۔ اس کا فائدہ اٹھاتے ہوئے وقفہ سے ٹھیک قبل رحیم اسٹرلنگ نے شاندار گول کرکے ٹیم کو دو صفر سے آگے کردیا۔ دوسرے ہاف میں آئیوری کوسٹ نے اپنی دفاعی لائن کو برقرار رکھنے اور مزید گول نہ ہونے دینے کی کوشش کی لیکن انگلینڈکے دفاعی کھلاڑی ٹائرون منگز نے کھیل کے بالکل آخری لمحات میں گول کرکے ٹیم کو 3-0سے کامیابی دلادی۔
