نئی دہلی،(یو این آئی):دہلی کے وزیر اعلی اروند کیجریوال نے آج 275 کروڑ روپے کی لاگت سے تعمیر ہونے والے 1430 بستروں کی گنجائش والے شالیمار باغ اسپتال کا سنگ بنیاد رکھا۔
اس موقع پر خطاب کرتے ہوئے وزیر اعلیٰ نے کہا کہ یہ پوری دنیا میں ایک ریکارڈ ہوگا کہ دہلی حکومت اگلے چھ ماہ کے اندر 6800 بستروں کی گنجائش کے سات نئے سرکاری اسپتال بنائے گی۔ آپ نے ایک ایماندار حکومت منتخب کی۔ جس کے نتیجے میں پہلے ایک عام بیڈ بنانے میں ایک کروڑ روپے خرچ ہوتے تھے لیکن ہماری حکومت آئی سی یو بیڈ بنانے پر صرف 20 لاکھ روپے خرچ کر رہی ہے۔ ایک ذمہ دار حکومت کی حیثیت سے ہم کورونا کی ممکنہ تیسری لہر کے پیش نظر تمام ضروری اقدامات کر رہے ہیں۔ ہم ایسا نظام بنانے جا رہے ہیں جس کے تحت دہلی کے ہر شہری کا اپنا صحت کارڈ ہوگا اور اس میں اس کی صحت کے بارے میں تمام معلومات ہوں گی۔
وزیر صحت ستیندر جین نے ٹویٹ کیا کہ”دہلی حکومت دہلی کے لوگوں کے لیے ایک اور جدید ترین ہسپتال بنانے جا رہی ہے۔ اس کی بنیاد وزیر اعلی اروند کیجریوال نے آج شالیمار باغ میں رکھی۔ 1430 بیڈ کی گنجائش والے اس ہسپتال کا تعمیراتی کام اگلے 6 ماہ میں مکمل ہو جائے گا۔
مسٹر کیجریوال نے بتایا کہ اگر کورونا کی تیسری لہر آتی ہے تو ایک ذمہ دار حکومت کے طور پر ہم تمام اہم اقدامات کر رہے ہیں۔ صرف اپریل کے مہینے میں جب کورونا کی دوسری لہر آئی، اسپتال میں بستروں ، آکسیجن اور آئی سی یو بیڈوں کی سب سے بڑی کمی تھی۔ اس خیال سے دہلی حکومت نے ایک بڑا قدم اٹھایا ہے۔
دہلی حکومت دہلی کے مختلف علاقوں میں سات نئے ہسپتال بنانے جا رہی ہے جن کی کل گنجائش 6800 بستروں کی ہوگی اور یہ تمام ساتوں اسپتال چھ ماہ میں تیار ہو جائیں گے۔ غالبا یہ عالمی ریکارڈ ہوگا کہ چھ ماہ میں 6800 بستروں کی گنجائش کے سات ہسپتال تیار ہوں گے۔مسٹر کیجری وال نے بتایا کہ آج ہم نے شالیمار باغ میں 1430 بستروں والے ہسپتال کی بنیاد رکھی ہے۔ آج سے چھ ماہ کے اندر یہ 1430 بستروں والا ہسپتال تیار ہو جائے گا۔ میں پی ڈبلیو ڈی کو بہت بہت مبارکباد دینا چاہتا ہوں کہ انہوں نے اس طرح کا ایک زبردست منصوبہ شروع کیا ہے اور انہیں یقین ہے کہ وہ اسے چھ ماہ میں مکمل کر لیں گے۔
اس ہسپتال میں ہر بیڈ آئی سی یو بیڈ ہوگا۔ ہسپتال کے تمام 1430 بیڈوں میں آئی سی یو کی سہولیات ہوں گی۔ ہر بیڈ پر آکسیجن ہوگی ، ہر بیڈ پر آئی سی یو کے لیے مانیٹر ہوگا۔ اگر آپ اسے عام بستر کے طور پر استعمال کرنا چاہتے ہیں تو آپ اسے ایک عام بستر کے طور پر استعمال کر سکتے ہیں اور اگر آپ اسے آئی سی یو بستر کے طور پر استعمال کرنا چاہتے ہیں تو آئی سی یو کا مکمل انفراسٹرکچر تمام 1430 بیڈز پر دستیاب ہو گا۔
وزیراعلیٰ نے کہا کہ ہسپتال کی کل لاگت 275 کروڑ روپے ہے جس میں 1438 بیڈ بنائے جارہے ہیں۔ اس ہسپتال پر فی بستر 20 لاکھ روپے لاگت آرہی ہے اور وہ بھی آئی سی یو بستروں کے ساتھ۔
کیجریوال نے کہا کہ دہلی میں صحت کے بنیادی ڈھانچے کی سہولیات اب پورے ملک کے سرکاری ہسپتالوں میں دستیاب بہترین سہولیات ہیں۔ اب ہمیں اسے عالمی معیار کا بنانا ہے۔ آنے والے وقت میں ہم ہیلتھ انفارمیشن مینجمنٹ سسٹم (ایچ آئی ایم ایس) کو نافذ کرنے جا رہے ہیں۔ اگلے ڈیڑھ سال کے اندر دہلی کے ہر شہری کا اپنا صحت کارڈ ہوگا۔ چاہے وہ غریب ہو یا امیر ، اس کی صحت کا سارا ڈیٹا کمپیوٹر پر ہوگا۔ وہ کسی بھی ہسپتال میں جائے گا اس کے بچپن سے لے کر آج تک کی تمام پرانی ایکس رے رپورٹس ، وہ تمام ڈیٹا کمپیوٹر پر ہوں گے۔ لوگ ہسپتال میں لمبی قطاریں لگانا چھوڑ دیں گے۔ آپ کمپیوٹر یا ایپ پر ڈاکٹر سے ملاقات کریں گے۔ ڈاکٹر اپائنٹمنٹ دے گا اور آپ اپنے مقررہ وقت پر ہسپتال پہنچ جائیں گے۔ آپ کو کہیں جانے کی ضرورت نہیں پڑے گی ، آپ سیدھے ڈاکٹر کے پاس جائیں گے اور ڈاکٹر آپ کا انتظار کر رہا ہو گا۔ جس کے ہاتھ میں ہیلتھ کارڈ ہے ، اس کا سارا علاج مفت ہوگا اور اسے اپنے بارے میں فکر کرنے کی ضرورت نہیں ہوگی۔
