دہرادون(ایجنسی):کوہ پیمائی کے لیے اتراکھنڈ کے ماؤنٹ ترشول جانے والے نیوی کے پانچ اہلکار برفانی تودے کی زد میں آکر لاپتہ ہوگئے۔ ان کے ہمراہ ایک پورٹر ( قلی) بھی غائب ہے۔ چمولی ضلع میں آج صبح کے حادثے کے بعد سے جوانوں سمیت چھ افراد کی تلاش کے لیے سرچ آپریشن کیا جا رہا ہے،لیکن ابھی تک کوئی سراغ جمع نہیں کیا گیا ہے۔
خبر رساں ایجنسی پی ٹی آئی کے مطابق اترکاشی میں واقع نہرو ماؤنٹینیرنگ انسٹی ٹیوٹ (این آئی ایم) کی ایک ٹیم کوہ پیماؤں کی تلاش میں موقع پر روانہ ہو گئی ہے۔ ٹیم کی قیادت انسٹی ٹیوٹ کے پرنسپل کرنل امیت بشٹ کر رہے ہیں۔ این آئی ایم کے مطابق انڈین نیوی کے ایڈونچر ونگ نے صبح 11 بجے کے قریب ریمف اور ریسکیو کے لیے این آئی ایم کی سرچ اینڈ ریسکیو ٹیم سے مدد مانگی۔ فوج کی امدادی ٹیمیں بھی لاپتہ کوہ پیماؤں کی تلاش کے لیے موقع پر پہنچ گئی ہیں۔ 20 رکنی بحریہ کی ٹیم تقریبا 15 دن پہلے 7120 میٹر بلند ترشول چوٹی پر گئی تھی۔
دوسری جانب چمولی کے ڈسٹرکٹ ڈیزاسٹر مینجمنٹ آفیسر نے کہا کہ ان
کے پاس اس حوالے سے کوئی سرکاری معلومات نہیں ہے لیکن معاملے سے متعلق معلومات اکٹھی کی جا رہی ہیں۔ ان کا کہنا ہے کہ ضلعی انتظامیہ نے اپنی ٹیمیں موقع پر روانہ کر دی ہیں، لیکن وہ بھی لاپتہ ہونے والے جوانوں کا کوئی سراغ نہیں ڈھونڈ سکے۔ بتایا جارہا ہے کہ خراب موسم کی وجہ سے لاپتہ افراد کے سراغ لگانے میں کافی دشواری پیش آرہی ہے۔ فوج،فضائیہ اور ریاستی ڈیزاسٹر رسپانس فورس کی ریسکیو ٹیمیں اور ہیلی کاپٹر آپریشن میں شامل ہیں۔
