راجیہ سبھا الیکشن کے دوران بی ایس پی اور ایس پی میں بڑے سیاسی ڈرامے بازی کے بعد الیکشن کمیشن نے پیر کو 10امیدواروں کو بلا مقابلہ راجیہ سبھا کیلئے منتخب ہونے کا اعلان کردیا۔پرچہ نامزدگی کی واپسی کی آخری تاریخ گزرنے کے بعد ریٹرننگ آفیسر نے امیدواروں کے بلامقابلہ منتخب ہونے کا اعلان کیا، جن میں بی جے پی کے 8، ایس پی اور بی ایس پی کے ایک-ایک امیدوار شامل ہیں۔ راجیہ سبھا کیلئے منتخب ہونے والے بی جے پی کے 8امیدواروں میں وفاقی وزیر ہردیپ سنگھ پوری،بی جے پی جنرل سکریٹری ارون سنگھ، سینئر بی جے پی لیڈر ہریدوار دوبے ، سابق یو پی ڈی جی پی برج لال، نیرج شیکھر،گیتا شاکیہ،بی ایل ورما اور سیما دویدی شامل ہیں۔دوسرے 2 امیدوار جو راجیہ سبھا کیلئے منتخب ہوئے، ان میں سماج وادی پارٹی کے پروفیسر رام گوپال یادو اور بی ایس پی کے رام جی گوتم ہیں۔ 29اکتوبر کو دستاویزات کی جانچ کے دوران بی ایس پی امیدوار رام جی گوتم کی حمایت کرنے والے 5 اراکین اسمبلی کے بغاوت کے بعد بڑا سیاسی ڈرامہ شروع ہوگیا۔بی ایس پی اراکین نے کھلے طور پر پارٹی سے بغاوت کردی اور امیدوار کی حمایت سے انکار کردیا۔ اس دوران انہوں نے ایس پی سربراہ اکھلیش یادو سے ملاقات بھی کی تھی۔لیکن 5حامی اراکین اسمبلی کی بغاوت کے بعد بھی بی ایس پی امیدوار رام جی گوتم کے دستاویزات درست پائے گئے، لیکن سماج وادی پارٹی حمایت یافتہ آزاد امیدوار پرکاش بجاج کا پرچہ ان کے تجویز کنندہ کے نام پر غلطی کی وجہ سے منسوخ کردیا گیا۔پرچہ نامزدگی منسوخ ہونے کے بعد آزاد امیدوار پرکاش بجاج نے سپریم کورٹ کا رخ کیا تھا کہ کورٹ نے ان کی عرضی خارج کرتے ہوئے الٰہ آباد ہائی کورٹ کے پاس جانے کو کہا ہے۔ 5 بی ایس پی اراکین اسمبلی، جنہوں نے پارٹی امیدوار کے خلاف بغاوت کی تھی، ان میں اسلم چودھری، اسلم رائینی،مجتبیٰ صدیق،حکیم لال بند اور گوند جاٹو شامل ہیں۔ان 5 کے ساتھ بی ایس پی کے 2مزید اراکین اسمبلی کو پارٹی مخالف سرگرمیوں کی پاداش میں پارٹی سے معطل کردیا گیا۔راجیہ سبھا کے اراکین، جن کی میعاد کار 20نومبر 2020کو پوری ہوری تھی، ان میں مرکزی وزیر اور بی جے پی ممبر ہردیپ سنگھ پوری، بی جے پی قومی سکریٹری ارون سنگھ، بی جے پی کے نیرج شیکھر، ایس پی کے رام گوپال یادو،روی پرکاش ورما،ڈاکٹر چندرپال سنگھ یادو اور جاوید علی خان، جبکہ بی ایس پی کے ویر سنگھ اور راجا رام و کانگریس کے پی ایل پنیا شامل ہیں۔
