لکھنؤ: اترپردیش کے وزیر اعلی یوگی آدتیہ ناتھ نے منگل کو کہا کہ سبھی اسپتالوں اور میڈیکل کالجوں میں آکسیجن کی غیر منقطع فراہمی کو یقینی بنایا جائے۔
یوگی نے ان لاک نظام کا جائزہ لیتے ہوئے کہا کہ اس بات کو یقینی بنایا جائے کہ آکسیجن طے شدہ قیمت کے مطابق ہی ملے۔کسی بھی صورت میں آکسیجن کی کالا بازاری نہ ہونے پائے۔ چیف سکریٹری کا دفتر ضلعی انتظامیہ سے رابطہ قائم کر کے کووڈ۔19 کے پیش نظر علاج کی سہولیات اور دیگر انتظامات پر لگاتار موثرجائزہ لیں۔
لیبوں کو وافر مقدارمیں ٹیسٹنگ کٹ فراہم کرائے جانے کی ہدایت دیتے ہوئے کہا کہ اسپتالوں، میڈیکل کالجوں اورلیبس میں ٹیسٹنگ کٹ کا بیک اپ رکھا جائے تاکہ جانچ کا کام بحسن خوبی انجام پاتا رہے۔ انہوں نے کووڈ۔19 کے انفیکشن پر کنٹرول میں ٹیسٹنگ کی اہم کردار پر زور دیتے ہوئے کہا کہ یہ کام پوری مستعدی سے کیا جانا چاہئے۔
اڈیشنل چیف سکریٹری کو ضلع اسپتالوں ،کمیونٹی ہیلتھ سنٹروں اور پرائمری ہیلتھ سنٹروں کی سہولیات کو اور مضبوط بنانے کے لئے مختلف ہدایات دیں۔ انہوں نے کہا کہ اڈیشنل چیف سکریٹری (ایجوکیشن)میڈیکل کالجوں اورطبی اداروں کی طبی سہولیات کو اور پختہ کریں۔
انہوں نے لکھنؤ،میرٹھ،گورکھپور،پریاگ راج، سہارنپور اور مظفر نگر پر خصوصی دھیان دئیے جانے کی ہدایت دیتے ہوئے کہا کہ ان اضلاع میں کورونا کے مریضوں کے علاج کا نظم مزید پختہ کرتے ہوئے کنٹیکٹ ٹریسنگ میں تیزی لائی جائے۔
