ممبئی: کورونا وائرس کے پھیلاؤ کے دوران شہریوں کی معاشی مشکلات کو سامنے رکھتے ہوئے دنیا کے مخلتف ملکوں میں حکومتوں نے آسانی فراہم کرنے کے لیے کچھ فیصلے کیے جن سے اب لوگوں کو پریشانی کا سامنا ہے۔ ہندوستان اور پاکستان میں حکومت کی جانب سے شہریوں کو ریلیف دینے کے لیے خصوصی پیکج کے تحت بلوں کی ادائیگیاں آسان بنانے کے لیے قسطوں میں ادائیگی کی سہولت فراہم کی گئی تھی۔ لاک ڈاون کے پیش نظر اس فیصلے سے جہاں کئی شہری خوش نظر آئے وہیں تین ماہ کے بعد زیادہ آنے والے بلوں کی وجہ سے حکومت کو تنقید کا سامنا بھی کرنا پڑا۔ بالی ووڈ اداکار ارشد وارسی نے بجلی کے بھاری بھر کم بلوں کی ادائیگی کے لیے اپنا گردہ بیچنے کا سوچ لیا ہے۔ فلم’منا بھائی ایم بی بی ایس‘کے ’سرکٹ‘کو آج کل بجلی کے بلوں نے پریشان کر رکھا ہے اور انہوں نے اس کا اظہار سماجی رابطے کی ویب سائٹ ٹوئٹر پر ایک ٹوئٹ کے ذریعے کیا ہے۔
ارشد وارسی نے لکھا کہ اُن کا بجلی کا بل بہت زیادہ آیا ہے اور جون کا بل ادا کرنے کے لیے انہوں نے اپنے اکاؤنٹ سے ایک لاکھ 3 ہزار 564 روپے نکالے ہیں۔ اداکار ارشد وارسی نے ٹویٹ کیا ہے کہ’پلیز میری پینٹنگز خرید لیں، مجھے اپنے بجلی کے بل ادا کرنے ہیں۔‘ اداکار ارشد وارسی نے مزید لکھا کہ وہ ’اپنے گردے آنے والے مہینے کے بجلی کے بل کے لیے رکھ رہے ہیں۔‘ سوشل میڈیا پر کچھ دن سے ہندوستانی صارفین کی جانب سے بلوں میں اضافے کے حوالے سے بحث کا سلسلہ جاری ہے۔ انڈین میڈیا کے مطابق کورونا لاک ڈاؤن کے دوران بجلی کے بلوں میں اضافے سے صرف فلم انڈسٹری کے افراد ہی نہیں بلکہ پورا ممبئی شہر پریشان ہے۔ اس سے قبل اداکارہ ہما سیلم قریشی نے لکھا تھا کہ ’بجلی کے نئے ریٹس آخر کیا ہیں؟ گزشتہ مہینے میں6 ہزار دیا جب کہ اس مہینے 50 ہزار دینا پڑا ۔ کیا کوئی نئی قمیتوں پر روشنی ڈالے گا‘ جس کے جواب میں اداکار ارشد وارسی نے لکھا تھا کہ ’ان بلوں کی اوسط رقم تو ہائی وے پر کی جانے والی ڈکیتی کے طرح ہے۔ موجودہ صورتحال کو دیکھتے ہوئے ہمیں وہ رقم ادا کرنی چاہیے جو ہم نے پچھلے سال اس ماہ ادا کی تھی‘ غور طلب ہے کہ ممبئی میں رہائش پذیر ارشد وارسی سمیت کئی معروف فنکار بجلی کے بلوں میں اچانک اضافے سے پریشان ہیں اور سوشل میڈیا کے ذریعے بلوں میں زیادتی کے خلاف آواز اٹھا رہے ہیں، جن میں ہما قریشی ، نمرت کور، سوہا علی خان، سمیت کئی اداکار شامل ہیں۔
