جموں و کشمیر کے ضلع ڈوڈا کے ایک دور دراز گاؤں میں فائرنگ میں ڈھوک ڈیفنس کمیٹی (ڈی ڈی سی) کا ایک رکن زخمی ہوگیا۔ پولیس عہدیدار نے آج اس بات کی اطلاع دی۔
سب ڈویزنل پولیس افسر عادل رشو نے بتایا کہ آج ساڑھے گیارہ بجے کے قریب بدرواہ شہر سے 16 کلومیٹر دور جومپاری ڈل میں نامعلوم مسلح افراد نے ڈی ڈی سی کے رکن پر گولی چلائی۔ گوپال ناتھ جو 35سال کے ہیں اور ڈوگی ڈنڈی گاوں کے رہنے والے ہیں کو دائیں ٹانگ میں کولی لگی ہے۔
زخمی کو جموں کے گورنمنٹ میڈیکل کالج (جی ایم سی) اسپتال لے جایا گیا۔
انہوں نے بتایا کہ ناتھ اور ڈی ڈی سی کے ایک اور ممبر ، فیروز دین ، ڈھوک (مٹی کے گھر) کے اندر موجود تھے جب ان پر گولیاں چلائی گئی۔
رشو نے بتایا کہ پولیس نے علاقے سے 12 بور کی بندوق برآمد کی ہے۔ افسر نے بتایا کہ ابتدائی تفتیش میں دہشت گردوں کے ہونے کا کوئی ثبوت نہیں ملا، فائرنگ کے واقعے کی مزید تفتیش جاری ہے۔
