حکومت کے ترجمان روہت کنسل نے دعویٰ کیا ہے کہ پورے ملک میں کورونا وائرس کے سب سے زیادہ ٹیسٹ جموں و کشمیر میں کئے جاتے ہیں۔
انہوں نے کہا کہ مرکز کے زیر انتظام خطے میں کورونا وائرس کے لئے ہورہے ٹیسٹوں کی شرح ملک کی تمام ریاستوں و مرکزی علاقوں سے سب سے زیادہ ہے۔
ترجمان نے کہا کہ ہماری کورونا ٹیسٹ کرنے کی گنجائش کافی بڑھ گئی ہے پہلے ہم روزانہ ایک سو لوگوں کا ٹیسٹ کرتے تھے جبکہ آج آٹھ ہزار لوگوں کا فی دن ٹیسٹ کیا جاتا ہے۔
انہوں نے کہا کہ جارحانہ اور مستقل جانچ اس بیماری کے خلاف واحد موثر ہتھیار ہے اور انتظامیہ اس کو موثر انداز میں آگے بڑھائے گی۔ جموں و کشمیر میں اس وباء سے اب تک 1،668 لوگ متاثر ہوئے ہیں، جن میں کشمیر ڈویژن سے 1،374 اور جموں ڈویژن سے 294 معاملے درج ہوئے ہیں۔ گزشتہ 24 گھنٹوں میں دو اموات سمیت 23 اموات کی اطلاع ملی ہے۔
گزشتہ آٹھ ہفتوں سے زیادہ عرصے سے حکومت نے صحت ، معاشی اور فلاحی محاذوں پر متعدد اقدامات کیے ہیں۔ کنسل نے کہا ، "جموں و کشمیر کووڈ-19 پر ابھرتی ہوئی صورتحال کو دیکھتے ہوئے کارروائی شروع کرنے والی پہلے ریاستوں یا مرکزی علاقوں میں سے ایک تھا ، اور ہماری بہت ساری مداخلت نہ صرف تیز بلکہ موثر رہی ہے۔ 1.8 لاکھ سے زیادہ افراد کو خطے میں نگرانی میں رکھا گیا۔
