نئی دہلی: کورونا وائرس 'كووڈ -19' کے پیش نظر نافذ ملک گیر لاک ڈاؤن کی وجہ سے دو ماہ تک ملتوی رہنے کے بعد وبا سے بچاؤ کے نئے قوانین کے ساتھ گھریلو مسافر بردار پروازیں آج سے دوبارہ شروع ہو گئیں۔ دہلی کے اندرا گاندھی بین الاقوامی ہوائی اڈے سے پہلی پرواز صبح 4.45 بجے روانہ ہوئی۔ ملک کی سب سے بڑی فضائی کمپنی انڈیگو کی پرواز نمبر 6 ای -643 نے ٹرمنل -3 سے پونے کے لئے پرواز کی۔ یہ ائیربس کا اے 320 طیارہ ہے، جس کے صبح سات بجے پونے پہنچنے کی توقع ہے۔ ذرائع نے بتایا کہ مقررہ وقت کے مطابق، دہلی آنے والی پہلی پرواز اسپائس جیٹ کی ایس سی -8194 ہے جو احمد آباد سے آئی ہے۔ اس کے آنے کا وقت صبح 7.45 بجے تھا۔ اس کے بعد صبح 7.55 بجے لکھنؤ سے انڈیگو کی 6 ای -769 پرواز آئی۔ كووڈ -19 انفیکشن کو روکنے کے لئے حکومت نے 25 مارچ سے گھریلو مسافر پروازوں کو مکمل طور پر بند کر دیا تھا۔ بین الاقوامی مسافر پروازیں 22 مارچ سے ہی بند ہیں۔ اس دوران کارگو پروازوں اور خصوصی اجازت حاصل شدہ مسافر بردار پروازوں کی سروس جاری تھی۔
