سرینگر: صریرخالد،ایس این بی
جنوبی کشمیر میں سرکاری فورسز نے محض ایک دن کے وقفہ کے بعد آج ایک اور چھاپہ مار کارروائی میں دو جنگجوؤں کو مار گرایا ہے جبکہ شمالی کشمیر کے ہندوارہ علاقہ میں بھی اسی طرح کی ایک کارروائی جاری ہے۔
ذرائع نے بتایا کہ جنوبی کشمیر کے پلوامہ ضلع میں فوج،جموں کشمیر پولس اور سی آر پی ایف کی ایک مشترکہ جمیعت نے جنگجوؤں کے ایک عارضی ٹھکانے پر چھاپہ مار کر دو جنگجوؤں کو مار گرایا ہے۔ایک سرکاری ترجمان نے اس واقعہ کی تصدیق کرتے ہوئے کہا کہ ڈانگر پورہ نامی گاؤں کے ایک گھر میں جنگجوؤں کی موجودگی سے متعلق اطلاع ملنے پر یہاں کا محاصرہ کیا گیا اور جونہی فورسز نے مذکورہ گھر کی جانب پیشقدقی کی اندر بیٹھے جنگجوؤں نے گولی چلا کر جھڑپ چھیڑ دی۔ترجمان کے مطابق ’’جوابی کارروائی‘‘ میں ایک طویل جھڑپ کے بعد دو جنگجوؤں کو مار گرایا گیا ۔ پولس کے مطابق جائے واردات سے دو نعشیں بر آمد کی گئی ہیں جنکی شناخت کی جا رہی ہے۔واضح رہے کہ روزنامہ راشٹریہ سہارا نے دو دن قبل ایک رپورٹ میں بتایا تھا کہ کشمیر میں ’’کونٹر انسرجنسی گرڈ‘‘نے پالیسی میں تبدیلی لاکر کس طرح اور کیوں جنگجوؤں کی سر عام شناخت ظاہر نہ کرنے اور انہیں لواحقین کو سونپنے کی بجائے دوردراز کے غیر آباد علاقوں میں در گور کرنے کا فیصلہ لیا ہے۔
پلوامہ سے ذرائع نے بتایا کہ جس مکان میں جنگجو موجود تھے فورسز نے اس پر بے شمار گولے پھینکے اور اسے پوری طرح زمین بوس کردیا۔ ان ذڑائع نے بتایا کہ بعدازاں ملبے سے دو نعشیں بر آمد کی گئیں جنہیں سرکاری فورسز اپنے ساتھ لے گئی ہیں۔
دریں اثنا شمالی کشمیر کے ہندوارہ علاقہ میں بھی سرکاری فورسز اور جنگجوؤں کے بیچ جھڑپ جاری ہونے کی اطلاع ہے۔جموں کشمیر پولس نے تفصیلات دئے بغیر اپنے ٹویٹر ہینڈل سے بتایا کہ کپوارہ ضلع کے ہندوارہ علاقہ میں چھانجہ مولہ کے مقام پر جنگجوؤں کے ساتھ ایک جھڑپ شروع ہوئی ہے۔یاد رہے کہ اس علاقہ کے جنگلوں میں گذشتہ روز جنگجوؤں کی نقل و حمل کی اطلاعات کے بعد فورسز نے یہاں تلاشی لینا شروع کیا تھا۔ ذرائع کے مطابق جنگجوؤں نے گولی چلاکر جائے واردات سے فرار ہونے میں کامیابی پائی تھی ۔اندازہ ہے کہ جنگجوؤں کے اسی گروہ کو گھیر لیا گیا ہے تاہم اسکی تفصیلات ملنا اور تصدیق ہونا باقی ہے۔ سرکاری فورسز نے حالیہ دنوں میں اپنی جنگجو مخالف کارروائیوں میں اچانک تیزی لائی ہے یہاں تک کہ گذشتہ پندرہ دنوں کے دوران زائد از ڈیڑھ درجن جنگجو مار گرائے گئے ہیں۔
