نئی دہلی: دن بھر کی تلاشی، ضبطی اور حراست کے بعد، دہلی پولیس نے منگل کو ‘نیوز کلک’ کے بانی اور ایڈیٹر ان چیف پربیر پورکایست اور فرم میں شیئر ہولڈر امیت چکرورتی کو غیر قانونی سرگرمیاں (روک تھام) ایکٹ کے تحت گرفتار کر لیا ہے۔ حکام نے بتایا کہ پولیس کے خصوصی سیل نے غیر ملکی فنڈنگ کی تحقیقات کے سلسلے میں چھاپے کے بعد نیوز پورٹل نیوز کلک کے دفتر کو سیل کر دیا ہے۔
پولیس نے کہا، “اب تک دو ملزمین، پربیر پورکیاستھ اور امیت چکرورتی کو اسپیشل سیل میں درج یو اے پی اے کیس کے سلسلے میں چھاپے، ضبطی اور تحویل کے سلسلے میں گرفتار کیا گیا ہے۔ مجموعی طور پر 37 مرد مشتبہ افراد سے پوچھ گچھ کی گئی اور 9 خواتین مشتبہ افراد سے ان کی رہائش گاہ پر پوچھ گچھ کی گئی۔ اس مدت کے دوران، ڈیجیٹل آلات اور دستاویزات وغیرہ کو چھان بین کے لیے ضبط/جمع کیا گیا ہے۔
اس سے پہلے دن بھر ملک کے کئی حصوں میں دہلی پولیس نے نیوز کلک سے منسلک صحافیوں کی رہائش گاہ پر چھاپہ ماری کی ہے اور کئی لوگوں سے پوچھ گچھ کی، کچھ صحافیوں کو دیر شام حراست میں لینے کے بعد چھوڑ دیا گیا ہے۔ دہلی پولیس کی جانب سے منگل کے روز کئی مقامات پر بیک وقت چھاپے مارے گئے۔ اس دوران پولیس کی اسپیشل سیل نے موبائل، لیپ ٹاپ، کمپیوٹر سمیت کئی الیکٹرانک شواہد قبضے میں لے لیے۔ پولیس نے یو اے پی اے کے تحت مقدمہ درج کیا ہے۔
ذرائع کے مطابق مقدمے کے اندراج کے بعد 2 اکتوبر کو اسپیشل سیل کے سینئر افسران کی میٹنگ ہوئی جس میں کیس کو آگے بڑھانے پر غور کیا گیا۔ جس کے بعد 3 اکتوبر یعنی آج صبح 6 بجے سے چھاپہ مار کارروائی شروع ہوئی۔ اسپیشل سیل کی ٹیم نے دہلی، نوئیڈا، غازی آباد، گروگرام، ممبئی میں تقریباً 100 مقامات پر چھاپے مارنے شروع کردیئے۔ ذرائع کے مطابق پہلے جن لوگوں پر چھاپے مارے جانے تھے ان کے ناموں کی فہرست بنائی گئی اور پھر انہیں اے بی سی کیٹیگریز میں تقسیم کیا گیا۔ اے کیٹیگری میں شامل افراد کو حراست میں لے لیا گیا ہے۔ اس چھاپے میں دہلی پولیس کے اسپیشل سیل کی تمام رینج کی ٹیمیں تعینات کی گئی ہیں۔ اس میں تقریباً 500 پولیس اہلکار شامل ہیں۔
مزید پڑھیں:
دہلی پولیس نے ملک بھر میں سو جگہوں پر نیوز کلک کے صحافیوں کی رہائش گاہ پر چھاپہ ماری، یو اے پی اے کے تحت معاملہ درج کیا
معلومات کے مطابق پولیس نے ہارڈ ڈسک کا ڈیٹا بھی لے لیا ہے۔ فنڈنگ کے سلسلے میں ای ڈی پہلے ہی نیوز کلک پر چھاپہ مار چکی ہے۔ ای ڈی نے اس معاملے میں منی لانڈرنگ کا معاملہ درج کیا تھا اور نیوز کلک کی کچھ جائیدادیں بھی ضبط کی تھیں۔ دہلی پولیس کے اسپیشل سیل کے اہلکار صحافیوں کی جگہوں کی تلاشی لے رہے ہیں۔ تاہم اس معاملے میں ابھی تک کوئی گرفتاری عمل میں نہیں آئی ہے۔ ذرائع کے مطابق کچھ صحافیوں کو پوچھ گچھ کے لیے پولس تھانوں میں لے جایا گیا ہے۔ای ڈی پہلے ہی نیوز پورٹل کے خلاف کیس درج کر چکی ہے اور اس کی فنڈنگ کی جانچ کر رہی ہے۔
