نعت نبیؐ

حسرت ہے کہ اس دنیا سے جب جانا مرا ہو
اے ربِ جہاں بر سرِ لب صلی علی ہو
آ ہی نہیں سکتا اسے مایوسی کا رونا
وہ جس کو میسر درِ محبوبِ خدا ہو
میں طیبہ و بغداد و نجف دیکھوں نہ جب تک
تب تک اے خدا مہرباں مجھ پے نہ قضا ہو
جب بھی پڑے غم تو مجھے محسوس ہو ایسا
سینے پہ تسلی کو ترا ہاتھ دھرا ہو
بس آپ فقط مجھ سے نہ ناراض ہوں آقا
کچھ غم نہیں جو سارا زمانہ یہ خفا ہو
اے مولیٰ مرے بخت کو دے دے یہ سعادت
ہر ایک قضا زیست کی طیبہ میں ادا ہو
دنیاوی مشاہیر کی باتوں کے بجائے
آ تذکرہ صاحبِ لولاک لما ہو
ذکی طارق بارہ بنکوی