نوجوانو!مساجد کو آباد کرو،کہیں ایسا نہ ہو کہ ہم سے مساجد چھین لی جائیں:اویسی

نئی دہلی (ایجنسیاں): رام مندر کے افتتاح کی تقریب کی تیاریوں اور سنہری مسجد پر جاری تنازع کے درمیان آل انڈیا مجلس اتحاد المسلمین (اے آئی ایم آئی ایم) کے صدر اسد الدین اویسی نے کہا کہ آج ہمارے پاس وہ جگہ نہیں ہے جہاں ہم نے 500 سال تک سجدہ کیا تھا۔ آپ دیکھ سکتے ہیں کہ اب وہاں کیا ہو رہا ہے۔ پیر (یکم جنوری) کو ایک جلسہ سے خطاب کرتے ہوئے انہوں نے کہاکہ یہ طاقتیں آپ کے دلوں سے اتحاد کو ختم کرنا چاہتی ہیں۔ برسوں کی محنت کے بعد آج ہم اس مقام پر پہنچے ہیں۔ اس لیے اپنی طاقت کو برقرار رکھیں۔ اس دوران انہوں نے وہاں موجود لوگوں سے مساجد کو آباد کرنے (نماز ادا کرنے) کی اپیل کی۔

اویسی نے کہا کہ نوجوانو، اپنی ملی حمیت (برادری کی فکر) اور طاقت کو قائم رکھیں اور مساجد کو آباد رکھیں، ورنہ ہماری مساجد ہم سے چھین لی جائیں گی۔انہوں نے عوام سے متحد رہنے کی اپیل کرتے ہوئے کہا کہ مجھے امید ہے کہ آج کا نوجوان یہ سوچے گا کہ اپنے آپ کو، اپنے خاندان اور اپنے علاقے کو کیسے بچایا جائے۔ اتحاد ایک طاقت ہے۔ اس لیے متحد رہیں۔اس سے قبل، سنہری مسجد کو ہٹانے کے لیے نئی دہلی میونسپل کونسل (این ڈی ایم سی) کی تجویز پر لوگوں کی رائے مانگنے کے سوالوں پراویسی نے کہا تھا کہ یہ نوٹیفکیشن ہمارے آئین کے آرٹیکل 25 کی خلاف ورزی کرتا ہے، جو آزادی اور مذہب کا بنیادی حق ہے۔ ایک ورثہ جگہ اور عبادت گاہ دونوں۔

مزید پڑھیں: منی پور میں فائرنگ سے چار افراد ہلاک، کرفیو نافذ

انہوں نے کہا کہ اس سے آرٹیکل 29 کی خلاف ورزی ہوتی ہے، کیونکہ یہ آرٹیکل کہتا ہے کہ ثقافت کا تحفظ ہونا چاہیے، یہ ثقافت کا حصہ رہا ہے۔ اویسی نے سوال کیا کہ بی جے پی اور نریندر مودی حکومت مسلمانوں سے اتنی نفرت کیوں کرتی ہے؟ وہ مساجد سے نفرت کیوں کرتے ہیں؟ مسجدوں سے آنے والی آواز سے نفرت کیوں ہے؟