مولانا محمد نعمان رضا
اسلام ایک مکمل دین ہے جو انسان کی دنیاوی اور اخروی زندگی کے تمام پہلوؤں کو شامل کرتا ہے۔ دین اسلام میں جہاں نماز، روزہ، زکوٰۃ اور حج جیسے فرائض کو اہمیت دی گئی ہے، وہیں جمعہ کے دن کو بھی ایک خاص مقام دیا گیا ہے۔ جمعہ کا دن تمام دنوں کا سردار اور فضیلت و برکت سے بھرپور دن ہے۔ اس دن کو عبادت، دعا، اجتماعی خیرخواہی اور ذکر الٰہی کے لیے خاص طور پر متعین کیا گیا ہے۔
قرآن مجید میں جمعہ کا ذکر: قرآن مجید میں اللہ تعالیٰ نے جمعہ کے دن کی اہمیت کو واضح طور پر بیان کیا ہے: ’’اے ایمان والو! جب جمعہ کے دن نماز کیلئے اذان دی جائے تو فوراً اللہ کے ذکر کی طرف دوڑو اور خرید و فروخت چھوڑ دو، یہ تمہارے لیے بہتر ہے اگر تم جانتے ہو‘‘ (سورہ الجمعہ)
یہ آیت اس بات کی واضح دلیل ہے کہ جمعہ کے دن نماز اور ذکرالٰہی کو دیگر تمام مشاغل اور کاموں پر فوقیت دی گئی ہے۔ یہ دن بندگی اور اخلاص کا دن ہے اور اس دن اللہ کی رحمتیں عام ہوتی ہیں۔
احادیث مبارکہ میں جمعہ کی فضیلت:نبی کریم ؐ نے جمعہ کے دن کی فضیلت اور اہمیت کے بارے میں بہت سی احادیث بیان فرمائی ہیں،اس دن کو تمام دنوں کا سردار بتایا، حضرت ابو ہریرہ رضی اللہ عنہ سے روایت ہے کہ رسول اللہ ؐ نے فرمایا: ’’بہترین دن جس پر سورج طلوع ہوا، جمعہ کا دن ہے۔ اسی دن آدم علیہ السلام پیدا کیے گئے، اسی دن جنت میں داخل کیے گئے اور اسی دن وہاں سے نکالے گئے۔‘‘(صحیح مسلم)
نمازِ جمعہ کی اہمیت: رسول اللہ ؐ نے فرمایا: ’’جو شخص جمعہ کے دن غسل کرے، اچھے کپڑے پہنے، خوشبو لگائے اور وقت پر مسجد پہنچے، خطبہ سنے اور خاموش رہے، تو اس کے پچھلے جمعہ سے اس جمعہ تک کے گناہ معاف کر دیے جاتے ہیں۔‘‘ اور دوسری احادیث میں ہیں کہ گناہ صغیرہ۔(صحیح بخاری)
دعاؤں کی قبولیت: حضرت ابو ہریرہ رضی اللہ عنہ سے روایت ہے کہ نبی ؐ نے فرمایا: ’’جمعہ کے دن ایک ایسی گھڑی ہے جس میں مسلمان بندہ اللہ سے جو بھی دعا مانگے، اللہ اسے قبول فرماتا ہے۔‘‘ (متفق علیہ)
جمعہ کے دن کی عبادات: اسلام نے جمعہ کے دن کے لیے چند مخصوص اعمال کو اہم قرار دیا ہے: غسل کرنا اور صاف لباس پہننا: رسول اللہ ؐ نے فرمایا: ’’جمعہ کے دن غسل کرنا ہر بالغ مسلمان پر واجب ہے۔‘‘ (صحیح بخاری)
جلدی مسجد جانا: جمعہ کے دن مسجد جلدی پہنچنے کو خاص فضیلت حاصل ہے۔ حدیث میں ہے: ’’جو شخص جمعہ کے دن پہلے گھنٹے میں مسجد آئے، وہ ایسا ہے جیسے اونٹ کا صدقہ کرے۔ دوسرے گھنٹے میں آنا گائے کا صدقہ کرنے کے برابر ہے، اور تیسرے گھنٹے میں آنا مینڈھے کا صدقہ کرنے کے برابر ہے۔‘‘ (صحیح بخاری)
خطبہ سننا: خطبہ سننا نمازجمعہ کا اہم حصہ ہے۔ خطبے کے دوران مکمل خاموشی اختیار کرنا اور توجہ دینا ضروری ہے۔
سورہ کہف کی تلاوت: رسول اللہ ؐ نے فرمایا: ’’جو شخص جمعہ کے دن سورہ کہف کی تلاوت کرے، اس کیلئے دو جمعہ کے درمیان نور ہوگا۔‘‘ (سنن دارمی)
درود شریف کی کثرت: جمعہ کے دن رسول اللہ ؐ پر درود بھیجنا ایک پسندیدہ عمل ہے۔نبی کریم ؐ نے فرمایا: ’’جمعہ کے دن مجھ پر کثرت سے درود بھیجا کرو، کیونکہ تمہارا درود مجھ تک پہنچایاجاتا ہے۔‘‘ (سنن ابی داؤد)
جمعہ کے دن کی اجتماعی ملاقات: جمعہ کا دن مسلمانوں کو اجتماعی طور پر عبادت کرنے اور ایک دوسرے سے ملنے کا بہترین موقع فراہم کرتا ہے۔ جمعہ کی نماز میں شرکت سے مسلمانوں کے درمیان اتحاد و اتفاق پیدا ہوتا ہے اور ان کے دلوںمیںمحبت اوربھائی چارے کے جذبات فروغ پاتے ہیں۔ مسلمانوں کیلئے نصیحت: آج کے دور میں، جہاں دنیاوی مصروفیات اور کاروباری مشغولیات نے انسان کو دینی فرائض سے دور کر دیا ہے، جمعہ کا دن ہمیں موقع فراہم کرتا ہے کہ ہم اپنی زندگی کو اللہ کے ذکرسے مزین کریں۔یہ دن ہمیں یاد دلاتا ہے کہ دنیاوی زندگی عارضی ہے اورآخرت کی تیاری کیلئے ہمیں اپنے اعمال کوبہتربناناہوگا۔یہ دن ہمیں اللہ کی بندگی، اجتماعی عبادات اور دینی اخوت کی اہمیت کا درس دیتا ہے۔ ہمیں چاہیے کہ ہم اس دن کی فضیلت اور اہمیت کو سمجھیں، اپنی زندگی کو بہتر بنائیں اور اللہ کے احکامات پر عمل کریں۔ جمعہ کے دن کے تمام مسنون اعمال کو اپنانے سے نہ صرف ہماری دنیاوی زندگی بہتر ہوگی بلکہ آخرت میں بھی کامیابی نصیب ہوگی۔
