نئی دہلی: پولس نے پارلیامنٹ کی حفاظتی خلاف ورزی کیس کے ماسٹر مائنڈ للت جھا کو جمعہ کو پٹیالہ ہاؤس کورٹ میں پیش کیا۔ جہاں عدالت نے انہیں 7 دن کے ریمانڈ پر پولیس کے حوالے کر دیا۔ للت جھا نے جمعرات کی رات دیر گئے دتہ پاتھ پولیس اسٹیشن میں خودسپردگی کی تھی۔ پیشی کے دوران دہلی پولیس کے وکیل نے عدالت کو بتایا کہ للت جھا نے پارلیمنٹ میں دراندازی کیس میں اپنے ملوث ہونے کا انکشاف کیا ہے۔ اس نے بتایا کہ وہ اس سازش کا ماسٹر مائنڈ کیسے تھا۔ اس بات کی تفصیلی تحقیقات کی جائیں گی کہ سازش کیسے رچی گئی۔
دہلی پولیس نے 15 دن کا ریمانڈ مانگا تھا، لیکن عدالت سے 7 دن کا ریمانڈ ملا۔ پٹیالہ ہاؤس کورٹ کے ایڈیشنل سیشن جج 2 ڈاکٹر ہردیپ پوری نے ملزم سے پوچھا، کیا آپ کے پاس کوئی وکیل ہے؟ جھا نے نفی میں جواب دیا۔ اس کے بعد عدالت نے جھا کو وکیل فراہم کیا۔
چار ملزمین ساگر شرما، منورنجن ڈی، نیلم آزاد اور امول شندے، جنہوں نے پارلیمنٹ کی سیکورٹی میں توڑ پھوڑ کی تھی، کو بھی جمعرات کو پٹیالہ ہاؤس کورٹ نے 7 دن کے پولیس ریمانڈ پر بھیج دیا ہے۔ پولیس نے پوچھ گچھ کے لیے ان چاروں کا 15 دن کا ریمانڈ بھی طلب کیا تھا۔
واضح ہوکہ، بدھ کے روز جب لوک سبھا میں صفر کا وقت چل رہا تھا، دو افراد مہمانوں کی گیلری سے ایوان میں داخل ہوئے۔ دونوں نے ایک چھوٹے سے ڈبے سے پیلا دھواں چھوڑا۔ ایوان میں نعرے بازی بھی کی گئی۔ یہ مظاہرین اسپیکر کی کرسی تک پہنچنے کی کوشش کر رہے تھے کہ اسی دوران کچھ اراکین اسمبلی نے انہیں پکڑ لیا۔ انہوں نے اس کی پٹائی کی اور بعد میں اسے سیکورٹی فورسیز کے حوالے کر دیا۔ اس کے ساتھ ہی پارلیمنٹ کے باہر احتجاج کر رہے نیلم اور امول شندے کو دہلی پولیس نے گرفتار کر لیا ہے۔
32 سالہ للت جھا اصل میں بہار کا رہنے والا ہے، لیکن وہ کولکاتا میں بطور استاد کام کرتا ہے۔ پولیس کا کہنا ہے کہ للت جھا آزادی پسند بھگت سنگھ سے متاثر ہیں۔ للت کولکاتا میں ایک این جی او کے جنرل سکریٹری ہیں۔
مزید پڑھیں: عصمت دری کے معاملے میں بی جے پی ایم ایل اے کو پچیس سال کی قید اور دس لاکھ کا جرمانہ
بدھ کو جب مظاہرین نے پارلیامنٹ کے احاطے میں رنگین دھواں چھوڑا تو للت جھا نے اس کی ویڈیو این جی او کے بانی اور ان کے ساتھی نیلکش کو بھیجی تھی۔ للت نے اس ویڈیو کو زیادہ سے زیادہ شیئر کرنے کو بھی کہا تھا۔ پولیس نے نیلکش سے بھی رابطہ کیا ہے۔
