میلبورن: ہندوستان کا اس سال آسٹریلیا دورہ اکتوبر میں ٹی -20 سیریز سے شروع ہوگا اور 17 جنوری کو تیسرے اور آخری ون ڈے تک جاری رہے گا۔
کرکٹ آسٹریلیا (سی اے) نے کورونا وائرس وبا کے درمیان 2020-21 سیزن کے اپنے پروگرام کا جمعرات کو اعلان کیا۔ ہندستانی ٹیم اس دورے میں 11، 14 اور 17 اکتوبر کو تین ٹی -20 میچوں کی سیریز کھیلے گی۔ یہ سیریز آسٹریلیا میں ٹی 20 ورلڈ کپ سے پہلے منعقد ہوگی۔ آسٹریلیا میں ورلڈ کپ 18 اکتوبر سے 15 نومبر تک کھیلا جائے گا۔ ہندستان دسمبر،جنوری میں آسٹریلیا کے ساتھ چار ٹیسٹ کھیلے گا جبکہ تین ون ڈے 12، 15 اور 17 جنوری کو کھیلے جائیں گے۔ سی اے نے اس سیزن کے لئے اپنے مکمل پروگرام کا اعلان کیا ہے جس میں وراٹ کوہلی کی کپتانی والی دنیا کی نمبر ایک ٹیسٹ ٹیم ہندستان اور آسٹریلیا کے درمیان بارڈر گواسکر ٹرافی کے لئے مقابلہ سب سے زیادہ دلچسپ ہوگا۔ ہندستان اور آسٹریلیا اس وقت آئی سی سی ٹیسٹ چمپئن شپ میں پہلے دو مقامات پر ہیں۔
سی اے کے سی ای او کیون رابرٹس نے پروگرام کا اعلان کرتے ہوئے کہا کہ پروگرام میں تبدیلی ہو سکتی ہے اور یہ کورونا کی صورتحال اور اس وقت پر حکومت کی ہدایات پر انحصار کرے گا۔ رابرٹس نے ساتھ ہی کہا کہ آسٹریلیا نے کورونا سے لڑنے میں جو کوششیں کی ہیں اس سے وہ پرجوش ہیں۔ رابرٹس نے کہا کہ سی اے سیریز کے لئے بی سی سی آئی کے ساتھ کام کر رہا ہے اور امید ہے کہ اس وقت تک حالات سازگار ہو جائیں گے۔ ہندستان آسٹریلیا کے دورے میں دن رات ٹیسٹ ایڈیلیڈ اوول میدان پر کھیلے گا جبکہ پہلا ٹیسٹ برسبین کے گابا میدان پر کھیلا جائے گا۔ تیسرا اور چوتھا ٹیسٹ میلبرن اور سڈنی میں کھیلا جائے گا۔ ٹی 20 سیریز کے میچ برسبین، کینبرا اور ایڈیلیڈ میں کھیلے جائیں گے جبکہ ون ڈے سیریز کے میچ جنوری میں پرتھ، میلبورن اور سڈنی میں کھیلے جائیں گے۔
ہندستان آسٹریلیا کی زمین پر گلابی گیند سے اپنا پہلا ڈے نائیٹ ٹیسٹ ایڈیلیڈ کے میدان پر کھیلے گا۔ ہندستان نے اپنا پہلا ڈے نائیٹ ٹیسٹ گزشتہ سال کولکاتہ کے ایڈن گارڈن میں بنگلہ دیش کے خلاف کھیلا تھا اور جیتا تھا۔
چار ٹسٹ میچوں کی سریز کا پہلا ٹسٹ برسبین میں ہوگا جہاں میزبان ٹیم 1988 کے بعد ہاری نہیں ہے۔ یہ پروگرام سامنے آنے کے بعد آسٹریلیا میں ایک ہی مقام پر سیریز کے تمام ٹیسٹ کرنے کے امکان ختم ہو گئے ہیں۔ آسٹریلیا اپنے گھریلو سیزن میں ہندستان کے علاوہ افغانستان، زمبابوے، ویسٹ انڈیز اور نیوزی لینڈ کی بھی میزبانی کرے گا۔
