نئی دہلی: انسانی وسائل کی ترقی کے مرکزی وزیر رمیش پوکھریال نے اعلان کیا کہ جائنٹ اینٹرنس امتحان (جے ای ای) مین اور نیشنل ایلجبلٹی اینٹرنس امتحان (این ای ای ٹی) اب ستمبر میں منعقد ہوگا۔ جے ای ای ایڈوانسڈ بھی ملتوی ہے۔ یہ اعلان ماہرین کے پینل کی پیش کردہ ایک رپورٹ کی بنیاد پر جاری کیا گیا۔ فیصلہ کووڈ 19 وبائی مرض کی موجودہ صورتحال پر غور کرنے کے بعد کیا گیا۔
اب ، جے ای ای مین – انڈرگریجویٹ لیول انجنیئر کورس میں داخلے کے لئے 1 سے 6 ستمبر اور جے ای ای ایڈوانسڈ 27 ستمبر کو ہوگا۔ اب نیٹ 13 ستمبر کو ہوگی۔ اس سال یہ دوسرا موقع ہے کہ امتحانات ملتوی کردیئے گئے ہیں۔ ان کا انعقاد بالترتیب اپریل اور مئی میں ہونا تھا۔
ایک ویڈیو پیغام میں ، انسانی وسائل کی ترقی کے وزیر نے کہا ، "مجھے امید ہے کہ اس وقت کو آپ اچھی طرح سے تیاری کے لئے استعمال کریں گے۔ انہوں نے تناو کے بغیر اس امتحانات کی تیاریوں پر بھی زور دیا۔
