مودی بھی کسانوں کا مسئلہ حل کرانا چاہتے ہیں،چرنجیت سنگھ چنی کا بڑابیان

نئی دہلی،(یو این آئی):پنجاب کے وزیر اعلیٰ چرنجیت سنگھ چنی نے جمعہ کو یہاں وزیر اعظم نریندر مودی سے ملاقات کی اور کہا کہ انہوں نے اس میٹنگ میں کسانوں کے احتجاج کا مسئلہ اٹھایا اور ان پر زور دیا کہ وہ ان کے مسائل حل کریں۔
مسٹر چنی نے وزیر اعظم کی رہائش گاہ پر مسٹر مودی سے ملاقات کے بعد صحافیوں کو بتایا کہ انہوں نے وزیر اعظم سے کسانوں کی تحریک ختم کرنے اور اس کے لیے کسانوں سے بات چیت کرنے کی درخواست کی ہے۔ انہوں نے وزیر اعظم سے زراعت سے متعلق تینوں قوانین کو واپس لینے کا بھی مطالبہ کیا ہے۔
انہوں نے بتایا کہ مسٹر مودی نے کہا ہے کہ وزیر اعظم خود بھی کسانوں کا مسئلہ حل کرنا چاہتے ہیں اس لئے انہیں یقین ہے کہ اس میٹنگ کے دوران انہوں نے مسٹر مودی سے کسانوں کے مفاد کے حوالے سے جو بھی مطالبہ کیا ہے اس پر مثبت غور کیا جائے گا اور جلد ہی وہ کسان جو طویل عرصے سے احتجاج کر رہے ہیں انہیں راحت ملے گی۔ اس کے علاوہ انہوں نے مسٹر مودی سے نامیاتی کاشتکاری کے بارے میں بھی بات کی ہے۔
انہوں نے بتایا کہ اس تحریک سے پنجاب کی معیشت بری طرح متاثر ہو رہی ہے۔ انہوں نے یہ بھی کہا کہ پنجاب نے ملک کے لیے بہت قربانیاں دی ہیں اس لیے ریاست کو مرکز سے کافی ملنا چاہیے۔مسٹر چنی نے بتایا کہ اس دوران انہوں نے مسٹر مودی پر زور دیا ہے کہ وہ جلد از جلد ہندوستان۔پاکستان کرتار پور راہداری کھولیں تاکہ عقیدت مند پاکستان میں واقع کرتارپور صاحب کے درشن کر سکیں۔ یہ راہداری کووڈ-19 وبائی امراض کی وجہ سے بند ہے۔انہوں نے بتایا کہ اس ملاقات کے دوران بات چیت بہت اچھے ماحول میں ہوئی ہے۔ اس کے لیے انہوں نے وزیر اعظم کا شکریہ ادا کیا ہے۔