نئی دہلی(ایجنسیاں) : لیجنڈز لیگ کرکٹ (ایل ایل سی) کے دوسرے ایڈیشن کا آغاز خصوصی میچ کے ساتھ ہوگا۔ کولکاتا کے ایڈن گارڈن میں ہندوستانی مہاراجہ اور ورلڈجائنٹس کے درمیان میچ ہندوستان کی آزادی کے 75ویں سال کے جشن کے لیے وقف ہوگا۔ 16ستمبر کو ہونے والے اس میچ میں ہندوستانی مہاراجے کی قیادت سابق ہندوستانی کپتان اور بی سی سی آئی کے صدر سورو گنگولی کریں گے، جب کہ ورلڈ جائنٹس کی قیادت انگلینڈ کے لیے 2019 ورلڈ کپ جیتنے والے کپتان ایون مورگن کریں گے۔ایل ایل سی کا دوسرا ایڈیشن خصوصی میچ کے ایک دن بعد شروع ہوگا، یعنی 17 ستمبر سے 8 اکتوبر تک، جس میں فرنچائز پر مبنی فارمیٹ میں چار ٹیمیں حصہ لیں گی۔مجموعی طور پر اس سیزن میں 22 دنوں کے دوران 15 میچ کھیلے جائیں گے۔
ہندوستان کے تمام عظیم کھلاڑی، جو آزادی کے 75ویں سال کا جشن منا رہے ہیں، 16 ستمبر کو دادا کی قیادت میں کرکٹ کے میدان میں نظر آئیں گے۔ یہ ایک نمائشی میچ ہوگا جس کے ایک دن بعد لیجنڈز لیگ کرکٹ (ایل ایل سی) کا آغاز ہوگا۔ لیجنڈز لیگ کے منتظمین نے جمعہ کو انڈیا مہاراجہ اور ورلڈ جائنٹس کے درمیان میچ کی تصدیق کی۔ یہ میچ ہندوستان کی آزادی کے 75 ویں سال سے منسلک تقریبات کے لیے وقف کیا جائے گا۔ ہندوستان سمیت دنیا بھر کے کئی بڑے کھلاڑیوں نے اس میچ میں کھیلنے کی رضامندی دی ہے۔ اس میچ میں شامل دونوں ٹیموں کے کھلاڑیوں کے نام یہ ہیں۔
انڈیا مہاراجہ: سورو گنگولی (کپتان)، وریندر سہواگ، محمد کیف، اجے جڈیجا، یوسف پٹھان، عرفان پٹھان، پارتھیو پٹیل، ایس بدری ناتھ، رتندر سنگھ سوڈھی، اسٹورٹ بنی، ایس سری سنتھ، ہربھجن سنگھ، نمن اوجھا، اشوک ڈنڈا، پرگیان اوجھا، آر پی سنگھ، جوگندر شرما۔
ورلڈ جائنٹس: ایون مورگن (کپتان)، سنتھ جے سوریا، ہرشل گبز، لینڈل سمنز، جیک کیلس، میٹ پرائر، نیتھن میک کولم، جونٹی رہوڈز، دنیش رامدین، اصغر افغان، متھیا مرلی دھرن، ڈیل اسٹین، ہیملٹن مساکڈزا، مشرفی مرتضیٰ، ، بریٹ لی، کیون اوبرائن۔
ہندوستانی ٹیم کے سابق ہیڈ کوچ روی شاستری لیجنڈز لیگ کرکٹ کے ڈپٹی کمشنر کے طور پر کام کر رہے ہیں۔ شاستری نے کہا، ’’یہ ہمارے لیے فخر کا لمحہ ہے کہ ہم اپنی آزادی کا 75 واں سال منا رہے ہیں۔ مجھے یہ بتاتے ہوئے بے حد خوشی ہو رہی ہے کہ ہم نے اس سال کو لیگ کے 75ویں سال کی آزادی کی تقریبات کے لیے وقف کرنے کا فیصلہ کیا ہے۔‘‘
