جنوبی کشمیر کے ضلع کولگام میں جمعے کی صبح ہونے والے ایک مسلح تصادم میں تین جنگجو مارے گئے ہیں۔ اس دوران فوج کے دو اہلکار زخمی ہوئے ہیں جنہیں علاج و معالجہ کے لئے فوجی ہسپتال میں داخل کرایا گیا ہے۔
جموں وکشمیر پولیس کے ایک ترجمان نے بتایا کہ ضلع کولگام کے ناگنڈ چمر علاقے میں جمعے کی صبح ہونے والے ایک تصادم میں تین عدم شناخت جنگجو مارے گئے ہیں۔
انہوں نے مزید کہا کہ مہلوک جنگجوئوں کے قبضے سے اسلحہ و گولہ بارود برآمد کیا گیا ہے نیز علاقے میں تلاشی آپریشن جاری ہے۔
سری نگر میں تعینات دفاعی ترجمان کرنل راجیش کالیا نے بھی کولگام تصادم میں تین جنگجوئوں کی ہلاکت کی تصدیق کی ہے۔ انہوں نے کہا کہ یہ جنگجو مخالف آپریشن جموں وکشمیر پولیس کو جنگجوئوں کے متعلق ملنے والی خفیہ اطلاع کی بنا پر شروع کیا گیا تھا۔
سرکاری ذرائع نے تفصیلات فراہم کرتے ہوئے کہا کہ ضلع کولگام کے ناگنڈ چمر علاقے میں جنگجوئوں کی موجودگی کے متعلق خفیہ اطلاع ملنے پر پولیس، فوج کی 9 آر آر اور سی آر پی ایف نے مذکورہ علاقے میں جمعے کی صبح کارڈن اینڈ سرچ آپریشن شروع کیا۔
انہوں نے کہا کہ سیکورٹی فورسز کی ایک پارٹی کی ایک مشتبہ جنگجو کی جانب پیش قدمی کے دوران وہاں موجود جنگجوئوں نے فائرنگ کی جس کے بعد طرفین کے درمیان تصادم شروع ہوگیا۔
سرکاری ذرائع نے بتایا کہ جنگجوئوں کی ابتدائی فائرنگ میں فوج کے دو اہلکار زخمی ہوئے جنہیں علاج ومعالجہ کے لئے سری نگر میں واقع فوجی ہسپتال میں داخل کرایا گیا ہے۔
انہوں نے مزید کہا کہ سیکورٹی فورسز کی کارروائی میں تین جنگجو مارے گئے ہیں جن کی شناخت معلوم کی جارہی ہے۔
