لکھنؤ(ایس این بی)
ہندوستان کی میزبانی میں آئندہ 13 سے 29 جنوری 2023 تک ہونے والے 15ویں مرد ہاکی ورلڈ کپ کی فاتح ٹرافی اب کھیل شائقین کے دیکھنے کے لیے اتر پردیش کے دارالحکومت لکھنؤ پہنچ گئی ہے۔ وزیر اعلیٰ یوگی آدتیہ ناتھ نے منگل کو اتر پردیش پہنچنے پر ٹرافی کا استقبال کیا۔اس خاص موقع پر، وزیر اعلیٰ نے للت اپادھیائے کو، جو ٹوکیو اولمپکس 2020 کی تمغہ جیتنے والی ہندوستانی ٹیم کے رکن ہیں، کو اتر پردیش پولیس میں ڈپٹی سپرنٹنڈنٹ آف پولیس کے عہدے کے لیے تقرری کا خط سونپا۔ مسٹر للت کے کھیلوں کے تعاون کی تعریف کرتے ہوئے وزیر اعلیٰ نے کہا کہ ریاستی حکومت ریاست میں کھیلوں اور کھلاڑیوں کے فروغ کے لیے پابند عہد ہے۔ اس سلسلے میں اولمپک، ایشین گیمز اور کامن ویلتھ گیمز سمیت مختلف بین الاقوامی مقابلوں میں میڈل جیتنے والوں کو سرکاری ملازمت کے مواقع فراہم کیے جا رہے ہیں۔اتر پردیش میں ہاکی ورلڈ کپ ٹرافی کی آمد پر خوشی کا اظہار کرتے ہوئے وزیر اعلیٰ نے کہا کہ پورا ملک آج بھگوان جگناتھ کی مقدس سرزمین اڈیشہ میں ہاکی ورلڈ کپ کی میزبانی کے لیے بے تاب ہے۔ وزیر اعظم کی رہنمائی میں یہ ہاکی مہاکمبھ دنیا کے لیے ہندوستان کے ‘اتیتھی دیو بھا’ کے جذبے سے واقف ہونے کا ایک موقع بھی ہوگا۔ انہوں نے ورلڈ کپ کے کامیاب انعقاد کے لیے ہاکی انڈیا کو بھی نیک خواہشات کا اظہار کیا۔ہاکی ورلڈ کپ میں شاندار مظاہرے کے ساتھ جیت کیلئے ہندوستانی ٹیم کی حوصلہ افزائی کرتے ہوئے وزیر اعلیٰ نے ورلڈ کپ کی میزبانی کو پورے ہندوستان کے لیے ایک تاریخی اور قابل فخر موقع قرار دیا۔
