نئی دہلی (ایس این بی) : یمنا میں پانی کی گرتی ہوئی سطح کو دیکھتے ہوئے وزیر آبی وسائل ستیندر جین نے منگل کو وزیر آباد بیراج کے مقام کا معائنہ کیا۔ انہوں نے وزیرآباد اور چندروال واٹر ٹریٹمنٹ پلانٹوں سے پانی پروڈکشن پر پڑنے والے اثرات پر بھی تشویش کا اظہار کیا کیونکہ ہریانہ سرکارکی طرف سے یمنا ندی میں پانی کم چھوڑا گیا ہے۔ہریانہ سرکار کی طرف سے کم پانی چھوڑنے کی وجہ سے وزیرآباد بیراج پر پانی کی سطح 674.5 فٹ سے اس سال کی کم ترین سطح 669 فٹ (5.5 فٹ سطح سے نیچے) نیچے آ گئی ہے۔
وزیر آبی وسائل ستیندر جین نے کہا کہ وزیر آباد تالاب دہلی کا سب سے اہم ذخیرہ ہے۔ یہ شمالی اور مغربی دہلی کے لیے پانی کے بڑے ذرائع میں سے ایک ہے۔ اس وقت ہریانہ سے پانی کے کم اخراج کی وجہ سے دہلی میں واٹر ٹریٹمنٹ پلانٹ اپنی صلاحیت سے کم کام کر رہے ہیں۔ اس کے نتیجے میں وزیر آباد ڈبلیو ٹی پی میں پانی کی پیداوار میں 60-70 ایم جی ڈی کی کمی واقع ہوئی ہے۔ ہریانہ سرکار کی طرف سے دہلی کے لوگوں کو پانی روکنے کی وجہ سے یمنا سوکھ گئی ہے۔
اس موقع پر ستیندر جین نے کہا کہ دہلی کی بڑھتی ہوئی آبادی کے ساتھ پانی کی مانگ میں بھی اضافہ ہوا ہے۔ پانی کا ایک بڑا حصہ وزیرآباد اور چندراول واٹر ٹریٹمنٹ پلانٹوں سے آتا ہے۔ آج جمنا کے پانی کی سطح 669 فٹ تک پہنچ گئی ہے ۔ ہریانہ کی طرف سے پانی کی مسلسل فراہمی کی وجہ سے دہلی والوں کو اپنے حصے کا پانی نہیں مل رہا ہے جو ان کا بنیادی حق ہے۔انہوں نے کہا کہ وزیرآباد واٹر ٹریٹمنٹ پلانٹ میں پانی کو براہ راست یمنا سے لے کر ٹریٹ کیا جاتا ہے، یہ پانی ہریانہ وزیرآباد بیراج کی طرف چھوڑتا ہے۔ اس پانی کو ٹریٹ کرنے کے بعد دہلی کے لوگوں کے گھروں تک پہنچایا جاتا ہے۔
وزیر آبی وسائل نے کہا کہ ہریانہ سرکار کے اس اقدام کی وجہ سے دہلی کے کئی علاقوں میں پانی کی سپلائی متاثر ہو رہی ہے۔ یہاں تک کہ دہلی سول لائنز کے آس پاس کے علاقوں، ہندو راؤ اسپتال کے علاقے، کملا نگر، شکتی نگر اور قرول باغ، پہاڑ گنج، اولڈ اینڈ نیو راجیندر نگر، پٹیل نگر، بلجیت نگر، اندرا پوری اور ملحقہ علاقوں میں اس دوران پانی کی سپلائی متاثر ہو رہی ہے۔
اس موقع پر ستیندر جین نے کہا کہ ہماری ہریانہ سرکارسے اپیل ہے کہ وہ یہاں آکر یمنا کی حالت دیکھیں۔ ہم ہریانہ کو 2022 کی آبادی کے حساب سے پانی فراہم کرنے کو نہیں کہہ رہے ہیں لیکن کم از کم ہمیں سپریم کورٹ کے حکم کے مطابق پانی دیں۔ ہمارے حصے کا پانی ہمارا حق ہے۔ ہریانہ سرکار کو بھی اس شدید گرمی میں دہلی والوں کی پیاس بجھانے کے لیے انسانی بنیادوں پر پانی فراہم کرنا چاہیے۔ میری اپیل ہے کہ دہلی کے شہریوں کو پانی دیں جیسا کہ وہ حقدار ہیں، تاکہ لوگ اپنے حقوق سے محروم نہ ہوں۔وزیر آبی ستیندر جین نے کہا کہ پانی کی قلت سے پریشان لوگ ٹینکر 1916 کے لیے دہلی جل بورڈ کے مرکزی کنٹرول روم سے رابطہ کر سکتے ہیں۔
