پاکستان کرکٹ ٹیم کے سابق کھلاڑی سرفراز نواز نے اپنے سابق ساتھی اور ملک کے موجودہ وزیر اعظم عمران خان کے متعلق انکشاف کیا ہے کہ عمران خان منشیات کے عادی رہے ہیں اور کیریر کے دوران چرس ،گانجہ اور ڈرگس کا استعمال کرتے تھے ۔
انہوں نے کہا ہے کہ عمران خان پاکستان کے لئے کھیلتے وقت منشیات استعمال کرتے تھے۔ اہم بات یہ ہے کہ عمران خان کا شمار دنیا کے اب تک کے سب سے بڑے آل راؤنڈرز میں ہوتا ہے۔عمران کو اپنی بولنگ اور بیٹنگ کے علاوہ ایک شاندار کپتان بھی کہا جاتا ہے۔ ان کی کپتانی میں ہی پاکستان نے 1992 کا کرکٹ ورلڈ کپ جیتا تھا۔ عمران نے اپنے کیریئر میں 362 ٹیسٹ اور 182 ون ڈے انٹرنیشنل وکٹ لئے۔
پاکستان کے سابق بالر سرفراز نواز نے دعویٰ کیا کہ انہوں نے 1987 میں عمران خان کو منشیات استعمال کرتے ہوئے دیکھا تھا۔ نواز نے کہا کہ انہوں نے عمران کو چرس پیتے دیکھا ہے۔ انہوں نے الزام لگایا کہ عمران کوکین بھی لیتے تھے ۔ سرفراز اورعمران 1970 اور 80 کی دہائی میں پاکستان کے تیز بولر تھے۔ انٹرنیٹ پر وائرل ہونے والی پاکستانی ویڈیو میں سرفراز نے یہ بھی دعوی کیا ہے کہ وہ ان کے اکلوتے گواہ نہیں ہیں۔ انہوں نے یہ بھی کہا کہ اگر ان کا دعویٰ غلط ہے تو عمران انہیں عدالت میں لے جاسکتے ہیں۔
سرفراز نے کہا کہ جب 1987 میں پاکستان اور انگلینڈ سیریز کے دوران عمران کی کارکردگی عروج پر نہیں تھی تو عمران خان اسلام آباد میں ان کے گھر آئے اور کھانے کے بعد منشیات کا استعمال کیا ۔سرفراز نے کہا کہ وہ کچھ سونگھتے بھی تھے وہ بھنگ بھی کھاتے تھے ۔ وہ لندن میں اور یہاں تک کہ میرے گھر میں یہ کام کرتے رہے ہیں ۔ 1987 میں جب پاکستان اور انگلینڈ کھیل رہے تھے ان دنوں انھوں نے اچھی بولنگ نہیں کی۔ وہ میرے گھر آئے اور ان کے ساتھ محسن خان ، عبدالقادر اور سلیم ملک بھی تھے۔ انہوں نے کھانے کے بعد چرس پی تھی۔
