رائے پور(ایجنسی):چھتیس گڑھ کے وزیراعلیٰ بھوپیش بگھیل کے والد نند کمار بگھیل کو پولیس نے دارالحکومت رائے پور سے برہمنوں پر متنازعہ بیان دینے کی وجہ سے گرفتار کیا ہے۔ گرفتاری کے بعد نند کمار بگھیل کو رائے پور کی عدالت میں پیش کیا گیا۔ جیسے ہی بگھیل کے والد کے بیان پرتنازعہ گہرا ہوا، وزیراعلیٰ نے کارروائی کی یقین دہانی کرائی اور کہا کہ ہماری حکومت میں قانون سے بالاتر کوئی نہیں ہے۔ ایسی صورت حال میں نند کمار بگھیل کی گرفتاری کے بارے میں قیاس آرائیاں کی جا رہی تھیں۔
دراصل حال ہی میں لکھنؤ میں منعقدہ ایک پروگرام میں چھتیس گڑھ کے وزیراعلیٰ بھوپیش بگھیل کے والد نند کمار بگھیل نے برہمن سماج پر قابل اعتراض ریمارکس دیتے ہوئے کہا کہ’ووٹ ہمارا،راج تمھارا نہیں چلے گا‘۔ ہم برہمنوں کو گنگا سے وولگا بھیجیں گے کیونکہ وہ غیر ملکی ہیں۔ جس طرح برطانوی لوگ آئے اور گئے۔ اسی طرح ان برہمنوں کو یا تو اصلاح کرنی چاہیے یا پھر گنگا سے وولگا جانے کے لیے تیار ہو جانا چاہیے۔
نند کمار کے وکیل گجیندر سونکر نے رائے پور میں بتایا کہ انہیں عدالتی تحویل میں بھیج دیا گیا ہے۔ انہیں 21 ستمبر کو دوبارہ عدالت میں پیش ہونے کے لیے کہا گیا ہے۔ وکیل نے کہا کہ نند لال نے ضمانت کے لیے درخواست نہ دینے کی ہدایات دی تھیں۔ اس لیے ضمانت کے لیے درخواست نہیں دی گئی ہے۔
نند کمار بگھیل کے ان بیانات کے خلاف رائے پور پولیس نے دفعہ 153-A اور دفعہ 505-A کے تحت مقدمہ درج کیا تھا۔ پولیس نے بگھیل کے خلاف فرقہ وارانہ ماحول خراب کرنے اور سماجی ہم آہنگی کو متاثر کرنے کی دفعات کے تحت مقدمہ درج کیا تھا۔ چنانچہ آج انھیں رائے پور سے گرفتار کیا گیا۔
یہاں بھوپیش بگھیل کے والد نند کمار بگھیل کے بیانات پر سیاسی ہنگامہ بھی شدت اختیار کر گیا۔ جب بھارتیہ جنتا پارٹی نے کانگریس کا زوردار مظاہرہ کیا تو ترف برہمن برادری کے کچھ لوگوں نے گورنر سے ملاقات کی اور کارروائی کے لیے ایک میمورنڈم پیش کیا۔
