نئی دہلی: مرکزی وزیر صحت وخاندانی فلاح وبہبود ڈاکٹر ہرش وردھن نے آج کہا ہے کہ نشیلی دواؤں اورنشیلی اشیاء کااستعمال ملک میں ایک سنگین صحت عامہ کا مسئلہ بن گیا ہے اوریہ صرف صحت سے متعلق مسئلہ نہیں ہے بلکہ یہ سماجی مسئلہ ہے۔
سماج اورصحت خدمات مہیاکرانے والوں کے آپسی تعاون سے ہی نشے کی لت کے خلاف مہم چلائی جاسکتی ہے۔
ڈاکٹر ہرش وردھن نے بدھ کو’اسٹینڈرڈ ٹریٹمنٹ گائڈلائنس فورمنیجمنٹ آف سبسٹینس یوز ڈس آرڈر اینڈ بیہیورل ایڈکشن‘ای۔ کتابچہ جاری کرتے ہوئے کہا کہ نشے کی لت ایک سماجی مسئلہ ہے۔اس کے تئیں لوگوں کے درمیان بیداری لانے میں سماج کے معززلوگوں اورمذہبی تنظیموں کو پہل کرنی چاہئے۔
انہوں نے بتایا کہ نشے کی لت کے برے نتائج برآمد ہوتے ہیں اوران کے علاج کے لئے صحت سے متعلق اہلکاروں کے پاس ایک معیاری ہدایات ہونا ضروری ہے۔
انہوں نے بتایا کہ ڈی۔ایڈکشن پروگرام (ڈی ڈی اے پی) کے ذریعہ تیار ہدایات کا کوئی بھی عام کلینک پیروی کرسکتا ہے۔ان کے پیروی کرنے سے نشے کی وجہ سے ہونے والی صحت سے متعلق مسائل کا حل ہوپائے گا اور یہ ملک کو زیادہ صحتمند،خوشحال بنانے میں مددگار ثابت ہوگا۔
