پنّا: (یو این آئی) مدھیہ پردیش کے ضلع پنا کی زمین سے ایک نوجوان کو بیش قیمتی ہیرا ملا ، جس کی نیلامی سے وہ کروڑ پتی بن گیا۔ پنا شہر کے کشور گنج علاقے میں رہنے والے ایک متوسط گھرانے کے نوجوان سشیل شکلا کو حال ہی میں کرشنا کلیان پور میں واقع ایک اتھلی کان سے 26.11 قیراط وزنی ہیرا ملا تھا۔ کل رات دیر گئے تک جاری رہنے والی ہیروں کی نیلامی میں ہیروں کے تاجر برجیش جاڈیا نے اونچی بولی لگا کر ہیرا ایک کروڑ 62 لاکھ سے زیادہ میں خرید لیا ہے۔ ممبئی میں ان کی مدر جیمز اینڈ کمپنی ہے جو ہیروں کا کاروبار کرتی ہے۔ ہیروں کی کھلی نیلامی کا اہتمام ڈائمنڈ آفس کی جانب سے نوین کلکٹریٹ میں واقع کمرے میں کیا گیا تھا۔ اس نیلامی میں 225.72 قیراط وزنی 154 ہیرے فروخت کے لیے رکھے گئے تھے جن میں 26.11 کیرٹس کا نایاب ہیرا بھی شامل تھا۔ نیلامی میں ممبئی، گجرات (سورت)، راجستھان اور مدھیہ پردیش کے ہیروں کے تاجروں نے بڑی تعداد میں حصہ لیا۔ سب کی توجہ کا مرکز 26.11 قیراط وزنی ہیرے کی نیلامی رہی۔ 25 فروری کو اس ہیرے کی نیلامی ہوئی اور پنا کے ہیروں کے تاجر برجیش جاڈیا نے اس قیمتی ہیرے کی جانچ کی اور سب سے زیادہ بولی لگا کر اسے خرید لیا۔
ڈائمنڈ افسر روی پٹیل نے بتایا کہ ممبئی کی مدر جیمز اینڈ کمپنی کی جانب سے برجیش جاڈیا نے اس ہیرے کی قیمت 6 لاکھ 22 ہزار روپے فی کیرٹ رکھی جو کہ سب سے زیادہ تھی۔ اس طرح 26.11 قیراط وزنی یہ ہیرا یک کروڑ 62 لاکھ 40 ہزار روپے میں فروخت ہوا۔
پٹیل نے بتایا کہ حکومت کی رائلٹی کاٹنے کے بعد باقی رقم ہیرے کے مالک سشیل شکلا کو دے دی جائے گی۔
