نئی دہلی (ایس این بی) : عام آدمی پارٹی نے کہا کہ غیر مجاز تعمیرات کو صاف کرنے کے نام پر بی جے پی پوری دہلی کو تباہ کرنے جا رہی ہے۔ بی جے پی کی حکومت والی میونسپل کارپوریشن دہلی میں تقریباً 63 لاکھ لوگوں کو بے گھر کرنا چاہتی ہے۔ دہلی کے نصف سے زیادہ علاقہ میں غیر مجاز تعمیرات ہیں۔ آدھی سے زیادہ دہلی ٹوٹ جائے گی۔ پہلے ان لیڈروں کے گھر گرائے جائیں جنہوں نے پیسے لے کر یہ غیر مجاز تعمیرات کروائیں۔
’آپ‘ کے چیف ترجمان سوربھ بھاردواج نے جمعرات کو پارٹی ہیڈ کوارٹر میں منعقد پریس کانفرنس میں کہا کہ پچھلے 15 دنوں سے بی جے پی کی حکومت والی ایم سی ڈی، دہلی پولیس کے ساتھ کئی جگہوں پر بلڈوزر اترے ہیں۔ وہ پوری دہلی کو تباہ کرنے کے لیے پرعزم ہیں۔ ہم غیر مجاز تعمیرات کے خلاف ہیں۔ دہلی کے لوگ غیر مجاز تعمیرات نہیں چاہتے۔ گزشتہ 15 سالوں سے دہلی میونسپل کارپوریشن کے اندر بی جے پی کی حکومت، بی جے پی میئر اور بی جے پی کی اسٹینڈنگ کمیٹی ہے۔ ایسے میں سوال یہ ہے کہ گزشتہ 15 سالوں میں یہ غیر مجاز تعمیرات اور ناجائز قبضے کس نے کروائے؟ بی جے پی کی حکمرانی میں ایم سی ڈی نے یہ کیا ہے۔ انہوں نے کہا کہ دہلی سرکارکے پاس دستیاب معلومات کے مطابق بی جے پی کی حکومت والی ایم سی ڈی دہلی کے اندر لاکھوں لوگوں کو بے گھر کرنا چاہتی ہے۔ دہلی کے اندر تقریباً 50 لاکھ لوگ غیر قانونی کالونیوں میں رہتے ہیں۔ ان کالونیوں کو کاٹا گیا، کالونیوں کے اندر تعمیرات کی گئیں، بی جے پی کی حکومت والی ایم سی ڈی کے افسران، جے ای، کونسلروں اور یہاں تک کہ بی جے پی کے بڑے لیڈروں کو پیسے دیے گئے۔ ایسی تقریباً 1750 کالونیاں ہیں۔ اس کے علاوہ دہلی کی تقریباً 10 لاکھ آبادی سیکڑوں کچی آبادیوں کے جھرمٹ میں رہتی ہے۔ اس کے علاوہ 3 لاکھ کی آبادی والے ڈی ڈی اے کے فلیٹ ہیں جن میں بالکونی میں تعمیرات ہیں۔ کسی نے الگ کمرہ بنایا ہے۔ کسی نے ستون گرا دیا ہے۔ ایسی صورت حال میں ایم سی ڈی کئی وجوہات کی وجہ سے ان کی عمارت کو توڑ سکتی ہے۔
