پال گھر: مہاراشٹر کے پال گھر کے موکھادا میں ایک لڑکی کا مبینہ طور سے اغوا کرنے اور آبروریزی کرنے کے معاملے میں ایک نوجوان کے خلاف معاملہ درج کیا گیا ہے۔ نوجوان کی شناخت جیش جادھو (19) کے طور پر ہوئی ہے۔
پولس نے جمعہ کو بتایا کہ نوجوان 18 سالہ ایک لڑکی کےساتھ رشتے میں تھا۔ بعد میں لڑکی نے کسی اور کے ساتھ سگائی کرلی تھی جس کی وجہ سے نوجوان مشتعل تھا۔
لڑکی نے بتایا کہ جیش جادھو نے 18 اپریل کی رات اس کا اغوا کیا اور تیوچا پاڈا علاقے کے ایک مکان میں لے کر گیا۔ وہاں پر ملزم نے لڑکی کودھمکی دی تھی کہ وہ اس کے منگیتر کو قتل کردے گا۔
پولس نے بتایا کہ نوجوان نے لڑکی کی آبروریز کی اور اگلے دو دنوں تک اسے اغوا کرکے رکھا جس کے بعد وہ کسی طرح وہاں سے فرار ہونے میں کامیاب ہوگئی۔ لڑکی نے بتایا کہ وہ لاک ڈاؤن کی وجہ سے واقعہ کے بہت دنوں بعد تک شکایت درج نہیں کراسکی تھی۔
پولس ترجمان ہیمنت کٹکر نے بتایا کہ نوجوان کے خلاف معاملہ درج کرلیا گیا ہے۔ ابھی تک کوئی گرفتاری نہیں ہوئی ہے اور معاملے کی مزید جانچ کی جارہی ہے۔
