کورونا وائرس کی وجہ سے رواں سال آسٹریلیا میں ہونے والے ٹی 20 ورلڈ کپ ملتوی کرنے کے بین الاقوامی کرکٹ کونسل (آئی سی سی) کے فیصلے کی حمایت کرتے ہوئے کرکٹ آسٹریلیا (سی اے) نے کہا ہے کہ ٹورنامنٹ کی صورتحال کی وضاحت کے لئے بورڈ کا خیرمقدم کرتے ہیں۔
آئی سی سی نے پیر کو اس سال ہونے والے ٹی 20 ورلڈ کپ کو ملتوی کرنے کا فیصلہ کیا ہے۔ یہ ٹورنامنٹ آسٹریلیا میں 18 اکتوبر سے 15 نومبر تک ہونا تھا۔ بورڈ نے مردوں کےتین ٹورنامنٹ کی ونڈو پر اتفاق کیا تھا جن میں اکتوبر-نومبر 2021 اور اکتوبر-نومبر 2022 میں ٹی 20 ورلڈ کپ اور اکتوبر-نومبر 2023 میں ون ڈے ورلڈ کپ شامل ہیں۔
تاہم آئی سی سی نے یہ اعلان نہیں کیا کہ دو ٹی 20 ورلڈ کپ کہاں ہوں گے۔ اصل شیڈول کے مطابق ہندوستان کو 2021 میں ٹی 20 ورلڈ کپ اور 2023 میں ون ڈے ورلڈ کپ کی میزبانی کرنی ہے۔
سی اے کے عبوری سی ای او نک ہاکلی نے کہا کہ ہم ٹورنامنٹ کی صورتحال کو واضح کرنے کا خیرمقدم کرتے ہیں جو ہماری تیاریوں کی منصوبہ بندی کے لئے ضروری تھا۔ حفاظت ہمارے لئے ضروری ہے اور ہم صحت کی صورتحال اور تازہ ترین معلومات کے مطابق آگے کی حکمت عملی پر کام کریں گے۔
انہوں نے کہا کہ ٹی 20 ورلڈ کپ 2021 میں ہو یا 2022 میں ہم صرف یہ چاہتے ہیں کہ یہ دونوں ٹورنامنٹ ہندوستان اور آسٹریلیا میں ہونے چاہئیں۔ اگر ہمیں 2021 میں میزبانی کا موقع ملا تو ہماری تیاری صحیح سمت میں ہے اور ہم اس کے لئے تیار ہیں۔ لیکن اگر ہمیں 2022 میں موقع ملا تو یہ ایک بہت بڑا ٹورنامنٹ ہوگا۔
