لکھنؤ: (یو این آئی) اتر پردیش میں 403 اسمبلی نشستوں کے لئے 10 فروری سے 07 مارچ تک ہونے والی پولنگ کے سات مرحلوں کے بعد آج ووٹوں کی گنتی شروع ہو گئی۔ الیکشن کمیشن کے مطابق جمعرات کو ریاست کے تمام اضلاع میں پہلے سے مقررہ وقت کے مطابق ووٹوں کی گنتی صبح آٹھ بجے شروع ہوئی۔ اس کے ساتھ ہی ان سیٹوں پر قسمت آزمائی کرنے والے 4406 امیدواروں کی قسمت کا فیصلہ ووٹوں کی گنتی کے بعد آج شام تک جاری ہونے والے انتخابی نتائج میں ہو گا۔ اس کے علاوہ اس بات پر بھی پردہ اٹھ جائے گا کہ تقریباً ایک ماہ تک جاری رہنے والے انتخابی عمل میں کون سی پارٹی کامیاب ہوتی ہے اور ریاست میں حکومت بنائے گی۔ اہم بات یہ ہے کہ اتر پردیش، اتراکھنڈ، پنجاب، گوا اور منی پور سمیت پانچ ریاستوں میں اسمبلی انتخابات کے لیے ووٹنگ کا عمل مکمل ہونے کے بعد جمعرات کی صبح آٹھ بجے ایک ساتھ مذکورہ تمام ریاستوں کے ووٹوں کی گنتی شروع ہو گئی۔ اتر پردیش کے 75 اضلاع کی 403 اسمبلی سیٹوں پر ووٹوں کی گنتی کے لیے تمام اضلاع میں کم از کم ایک گنتی مرکز قائم کیا گیا ہے۔ ووٹوں کی گنتی کے حوالے سے کمیشن کی طرف سے دی گئی معلومات کے مطابق پوسٹل بیلٹ اور سروس ووٹوں کی گنتی سب سے پہلے اس وقت کی جائے گی جب صبح 8 بجے ووٹوں کی گنتی شروع ہوگی۔ اس کے بعد ای وی ایم کے ووٹوں کی گنتی 8:30 بجے شروع ہوگی۔ ووٹوں کی گنتی کے دوران ہر سیٹ پر ایک مبصر تعینات کیا گیا ہے۔ ووٹوں کی گنتی کے دوران پورے عمل کی ویڈیو گرافی کی جائے گی۔
کووڈ پروٹوکول کے پیش نظر کمیشن نے انتخابی نتائج کے اعلان کے بعد فتح کے جلوسوں اور ریلیوں وغیرہ کے انعقاد پر مکمل پابندی لگا دی ہے۔ اس دوران سیکورٹی کے سخت انتظامات کئے گئے ہیں۔ ریاست کے ایڈیشنل ڈائرکٹر جنرل آف پولیس (لاء اینڈ آرڈر) پرشانت کمار نے کہا کہ الیکشن کمیشن کی ہدایت کے مطابق 70 ہزار پولیس اہلکار، 245 کمپنی نیم فوجی دستے اور 69 کمپنی پی اے سی کو گنتی مراکز پر تعینات کیا گیا ہے۔ کمار نے بتایا کہ تمام اہم مقامات پر ویڈیو گرافی اور فوٹو گرافی کی جائے گی۔ یہی نہیں تمام اضلاع میں دفعہ 144 نافذ ہے۔
