نئی دہلی: ملک میں عالمی وبا کورونا وائرس کا انفیکشن تیزی سے پھیل رہا ہے اور اس سے متاثر ہونے والوں کی تعداد 70 ہزار سے تجاوز کر گئی ہے۔
ملک کے مختلف حصوں میں گزشتہ 24 گھنٹوں کے دوران کورونا انفیکشن کے 3604 نئے معاملے سامنے آنے کے بعد متاثرین کی تعداد 70 ہزار سے زیادہ ہو گئی اور اس دوران 87 لوگوں کی موت ہوئی ہے۔ اس کے ساتھ ہی ہندوستان 50 ہزار سے زائد متاثرین کی تعداد والے ممالک کی فہرست میں 13 ویں مقام پر پہنچ گیا ہے۔
صحت اور خاندانی بہبود کی مرکزی وزارت کی جانب سے آج صبح جاری اعداد و شمار کے مطابق ملک کی مختلف ریاستوں اور مرکز کے زیر انتظام علاقوں میں کورونا سے اب تک 70756 لوگ متاثر ہوئے ہیں اور 2293 اموات ہوئی ہیں۔ وہیں اب تک 22455 لوگ اس انفیکشن سے مکمل طور ٹھیک ہوئے ہیں اور انہیں مختلف اسپتالوں سے چھٹی دے دی گئی ہے۔
ملک میں کورونا سے سب سے زیادہ متاثر مہاراشٹر ہوا ہے اور اس کی وجہ سے ریاست کی حالت مسلسل بگڑ رہی ہے۔ مہاراشٹر میں 23401 لوگ اس کی زد میں آ چکے ہیں اور 868 لوگوں کی موت ہو چکی ہے۔ وہیں ریاست میں 4786 لوگ اس انفیکشن سے ٹھیک بھی ہوئے ہیں۔
