نئی دہلی، (ایجنسیاں) : کمرشیل ایل پی جی سلنڈر استعمال کرنے والے گاہکوں کو دھچکالگا ہے۔ اس زمرے کے سلنڈر کی قیمت 105 روپے بڑھ چکی ہے۔نیوز ایجنسی اے این آئی کے مطابق مہنگائی بڑھنے سے گاہکوں کی جیب پر اضافی بوجھ پڑے گا، حالانکہ گھریلو سلنڈر کی قیمت میں کوئی تبدیلی نہیں کی گئی ہے۔ یہ بڑھی ہوئی قیمت یکم مارچ 2022 سے نافذ کی جائے گی۔ قیمت میں اس اضافہ کے ساتھ دہلی میں منگل سے19کلو گرام کے کمرشیل سلنڈر کی قیمت 2012روپے ہوجائے گی، جبکہ 5 کلوگرام گیس کے سلنڈر کی قیمت میں بھی 27روپے کا اضافہ ہوا ہے۔ یعنی اب دہلی میں 5کلو گرام کے سلنڈر کی قیمت 569 روپے ہوگی۔ وہیں کولکاتا میںکمرشیل گیس سلنڈر کی قیمت 105 روپے بڑھ کر 2089 روپے ہوگئی ہے۔ ممبئی میں بھی کمرشیل گیس کی قیمت میں 105روپے کا اضافہ ہوا ہے، یعنی یہاں سلنڈر کی قیمت 1962 روپے ہوگئی ہے، جبکہ چنئی میں 19کلوگرام کے کمرشیل گیس سلنڈر کی قیمت 2185.5 روپے ہوگئی ہے، جس میں 105 روپے کا اضافہ درج کیا گیاہے۔ صرف 5 مہینوں کی مدت میں کمرشیل ایل پی جی کی قیمتوں میں 5گنا اضافہ دیکھا گیاہے۔ قیمتوں میں آخری بار یکم نومبر کو اور اس سے پہلے 15اکتوبر کو اضافہ کیاگیاتھا۔ دریں اثنا روس اور یوکرین کے درمیان جاری جنگ نہ صرف ان دونوں ممالک بلکہ ہندوستان سمیت کئی دوسرے ممالک پر بھی اثر انداز ہو رہی ہے۔ صنعتوں پر بحران کے بادل چھانے لگے ہیں۔ آنے والے دنوں میں فیکٹریوں میں پیداوار متاثر ہو سکتی ہے، خاص طور پر یوکرین سے درآمد کیے جانے والے خام مال، تیل اور کیمیکلز کی سپلائی بند ہونے کی وجہ سے اس میں بھی فارما سیکٹر کو دھچکا لگا ہے۔ زیادہ تر کمپنیاں دواسازی کیمیکلز اور پیکیجنگ کے خام مال کیلئے روس-یوکرین سمیت (آزاد ریاستوں کی دولت مشترکہ) پر انحصار کرتی ہیں۔خبر کے مطابق فارما کمپنیوں کے علاوہ دیگر صنعتی یونٹس جیسے آئرن گڈز کمپنیاں، بیوٹی پروڈیکٹس، پرفیوم فیکٹریاں مختلف بندرگاہوں کے ذریعے یوکرین سے خام تیل، کیمیکل اور لوہا وغیرہ درآمد کرتی ہیں۔
یہ ضلع کی کیمیکل اور دیگر فیکٹریوں میں استعمال ہوتے ہیں۔ جنگ کی وجہ سے بندرگاہوں پر کروڑوں روپے کا سامان پھنس گیا ہے۔
خام مال کی قیمتوں میں اضافے کے باعث ادویات کی پیکنگ اور قیمتوں پر بھی اثر دیکھا جائے گا۔ فارما یونٹس بڑے پیمانے پر روس اور یوکرین سے پیکیجنگ کی شکل میں مختلف کیمیکلز اور ایلومینیم فوائل درآمد کرتے ہیں۔ جنگ کی وجہ سے گزشتہ 10 دنوں میں ایلومینیم فوائل (پیکیجنگ) کی قیمت میں 100 روپے فی کلو سے زائد کا اضافہ ہوا ہے۔ ایلومینیم فوائل کورونا کے دور میں 265 روپے فی کلو تک بڑھ گیا، پھر 335 روپے فی کلو ہو گیا تھا۔
