نئی دہلی (ایجنسیاں)مرکز اور گجرات دونوں میں بی جے پی کی حکومت ہے۔ لیکن بلقیس بانو ریپ کیس کے ملزمان کی رہائی کے معاملے میں دونوں کے درمیان ہم آہنگی نہ ہونے کا معاملہ سامنے آیا ہے۔ بتایا جا تاہے کہ ان ملزمان کی رہائی میں ریاستی حکومت نے مرکزی حکومت کی طرف سے جاری ہدایات کو نظر انداز کیا ہے۔ کہا جا تاہے کہ آزادی کے امرت مہوتسو کے دوران جن قیدیوں کو مرکزی حکومت سے رہائی کی اجازت ملی تھی، ان میںعصمت دری کے مجرم شامل نہیں تھے۔ اس کے باوجود گجرات حکومت نے بلقیس بانو ریپ کیس میں عمر قید کی سزا کاٹنے والے 11 افراد کو رہا کر دیا۔ اس سال جون میں آزادی کے امرت مہوتسو کے تحت مرکزی حکومت نے ریاستوں کے لیے گائیڈ لائن جاری کی تھی۔ اس کے تحت جیل میں طویل سزا کاٹ رہے مجرموں کی رہائی کے لیے خصوصی پالیسی تجویز کی گئی۔ حالانکہ اس میں عصمت دری کے مقدمات میں سزا کاٹ رہے مجرموں کو رہا کرنے کا کوئی بندوبست نہیں تھا۔ اس طرح تکنیکی طور پر دیکھا جائے تو بلقیس بانو ریپ کیس کے ملزمان کو اس گائیڈ لائن کے مطابق رہا ئی نہیں ہوئی۔ اس معاملے میں گجرات حکومت نے اپنی پالیسی پر عمل کیا اور سپریم کورٹ کی جانب سے مئی میں معافی کی درخواست پر دی گئی ہدایات کے مطابق انہیں جیل سے رہا کر دیا۔گجرات حکومت عصمت دری کیس کے قصورواروں کو رہا نہ کرنے کے مرکزی حکومت کے اصول کے خلاف گئی ہے۔ یہی نہیں بلکہ وزارت داخلہ کی ویب سائٹ پر موجود مرکزی حکومت کے رہنما خطوط میں یہ نکتہ بھی ہے کہ عمر قید کی سزا پانے والوں کو بھی نہیں بخشا جانا چاہیے۔ اس طرح بلقیس بانو ریپ کیس کے 11 ملزمان اس معیار پر عمل نہیں کرتے۔ دوسری جانب گودھرا سب جیل سے باہر آنے پر ملزمان کا استقبال مٹھائی سے کیا گیا۔ جیل سے باہر آنے کے بعد درخواست دائر کرنے والے رادھے شیام شاہ نے اس پر خوشی کا اظہار کیا۔ رہائی کا فیصلہ ان کی درخواست پر کیا گیا ہے۔ رادھے شیام نے کہا کہ اب میں اپنے کنبہ سے ملوں گا اور نئی زندگی شروع کروں گا۔ واضح رہے کہ 2002 کے گودھرا فسادات کے دوران بلقیس بانو کے ساتھ اجتماعی عصمت دری کی گئی تھی۔ اس دوران ان کے خاندان کے کچھ افراد کو بھی قتل کر دیا گیا۔ اس وقت بلقیس بانو کی عمر 21 سال تھی اور وہ5 ماہ کی حاملہ تھیں۔3 مارچ 2002 کو پیش آنے والے اس واقعہ میں بلقیس کے معصوم بچے سمیت خاندان کے 6 افرادمارے گئے تھے۔ 2008 میں ممبئی سی بی آئی کی خصوصی عدالت نے اس معاملے میں 11 قصورواروں کو عمر قید کی سزا سنائی تھی۔ بعد میں بمبئی ہائی کورٹ نے بھی اس سزا کو برقرار رکھا۔ بلقیس بانو کے اہل خانہ نے بھی ملزم کی رہائی پر حیرت کا اظہار کیا ہے۔ انہوں نے یہ بھی کہا کہ انہیں اس کارروائی کے بارے میں نہیں بتایاگیا۔ادھر مجلس اتحاد المسلمین کے صدر اسدالدین اویسی نے کہا کہ یہ سب گجرات انتخابات کی وجہ سے ہورہاہے ۔
