واشنگٹن:(یو این آئی) امریکہ میں چین کے سفیر کن گینگ نے اس بات کی تردید کی ہے کہ بیجنگ نے یوکرین جنگ کے دوران روس کو فوجی امداد فراہم کی ہے۔ انہوں نے کہا کہ بیجنگ نے جنگ کا جواب جنگ بندی، امن مذاکرات کو فروغ دینے اور انسانی امداد بھیج کر دیا ہے۔ سی بی ایس نیوز نے کن کا حوالہ دیتے ہوئے کہا’’جمعہ کو صدر شی جن پنگ اور صدر بائیڈن کے درمیان ویڈیو کال ہوئی، اس دوران صدر شی نے چین کی پوزیشن کو بالکل واضح کیا، یعنی چین امن اور جنگ کا مخالف ہے‘‘۔
اتوار کو روس کو فوجی امداد بھیجنے کے چین کے الزامات کی تردید کرتے ہوئے انہوں نے کہا کہ “چین کی جانب سے روس کو فوجی امداد فراہم کرنے کی اطلاعات غلط ہیں۔ ہم اس کی تردید کرتے ہیں۔ چین خوراک، ادویات، سلیپنگ بیگ اور بے بی فارمولا بھیج رہا ہے۔” انہوں نے مزید ک ہا کہ “ہمیں یوکرین کی صورتحال کو اس طرح دیکھنے سے نفرت ہے اور ہم فوری جنگ بندی کا مطالبہ کرتے ہیں، ہم امن مذاکرات کو فروغ دے رہے ہیں، اور ہم انسانی امداد بھیج رہے ہیں۔”
خیال رہے جمعہ کے روزامریکی صدر جو بائیڈن نے شی جن پنگ کو یوکرین کے شہروں اور شہریوں پر حملوں کے درمیان روس کو امداد فراہم کرنے کے سنگین نتائج سے خبردار کیا تھا۔ اس کے جواب میں شی نے کہا، “تمام فریقین کو مشترکہ طور پر روس اور یوکرین کے مذاکرات کی حمایت کرنے کی ضرورت ہے۔ صرف بات چیت سے نتائج برآمد ہوں گے اور امن کی طرف لے جایا جائے گا۔ چین ایک امن پسند ملک ہے۔”
