ممبئی:ہزاروں کروڑ روپے کے قرض کے بھگوڑے شراب کے کاروباری وجے مالیہ کو گزشتہ روز زبردست جھٹکا لگا جب منی لانڈرنگ معاملوں میں یہاں کی ایک خصوصی عدالت نے اسٹیٹ بینک آف انڈیا کی قیادت والے گروپ کو مالیہ کی ضبط کی گئی جائیدادوں کو نیلام کرنے کی اجازت دے دی ہے ۔مالیہ پر مختلف بینکوں کا گیارہ ہزار کروڑ روپے سے زیادہ کا قرض ہے اور وہ ملک سے معاشی بھگوڑا قرار دیا جاچکا ہے۔منی لانڈرنگ قانون (پی ایم ایل ایل)عدالت نے مالیہ کی جائیداد بیچنے کے فیصلے پر 18جنوری تک روک لگادی ہے ۔ یہ پابندی متعلقہ فریقوں کو بامبے ہائی کورٹ میں اپیل دائر کرنے کےلئے دیئے گئے بیان کے لحاظ سے لگائی گئی ہے ۔مالیہ کے اوپر سب سے زیادہ قرض اسٹیٹ بینک آف انڈیا کا ہے ۔ انفورسمنٹ ڈائریکٹوریٹ (ای ڈی)نے عدالت سے کہا تھا کہ اسے وصولی سے کوئی اعتراض نہیں ہے ۔ مالیہ کے وکیلوں کو اعتراض تھا کہ یہ صرف قرض وصولی عدالت ہی طے کرسکتی ہے ۔بینکوں کا تقریباً 9ہزار کروڑ روپے کا قرض نہیں دینے ، جعل سازی اور منی لانڈرنگ معاملے میں مالیہ فی الحال برطانیہ میں مقدموں کا سامنا کررہا ہے۔ مالیہ کے معاملے میں لندن کی عدالت نے فیصلہ محفوظ رکھا ہے اور اس ماہ میں فیصلہ آسکتا ہے ۔
