نئی دہلی (ایس این بی) : دہلی پولیس کمشنر کے اضافی کام کاج سنبھالنے کے لئے بالا جی شری واستو کوتقرر کیا گیا ہے۔اس وقت وہ اسپیشل سی پی وجیلنس ہیں۔واضح رہے کہ موجودہ پولیس کمشنر ایس این شریواستو 30جون کو سبکدوش ہورہے ہیں ۔ایسے میں دہلی پولیس کے نئے پولیس سربراہ بالاجی شریواستو ہوں گے ۔فی الحال انہیں پولیس کمشنر کی اضافی ذمہ داری سونپی گئی ہے۔
بالا جی شری واستو 1988بیچ کے آئی پی ایس افسر ہیں اور وہ دہلی پولیس میں کئی اہم عہدوں پر رہ چکے ہیں ۔حال ہی میں وہ پڈیچیری کے ڈی جی تھے ،جہا سے کچھ ماہ قبل ہی وہ دہلی پولیس میں واپس آئے ہیں ۔انہیں ابھی پولیس کمشنر کی اضافی ذمہ داری سونپی گئی ہے ۔یہ مسلسل دوسری بار ہے جب دہلی پولیس کمشنر عہدے کے لئے لک آفٹر کا چارج دیا گیا ہے۔اس سے قبل ایس این شریواستو کو بھی ایڈیشنل چارج دیا گیا تھا اور ریٹائر منٹ کے قریب ایک مہینہ پہلے آفیشیل طور پر انہیں پولیس کمشنر بنایا گیا تھا ۔سہل زبان اخلاق کے مالک اور ملن سار بالاجی شریواستو ریسرچ اینڈ انالائسز ونگ ،میزورم کے ڈائریکٹر جنرل،اسپیشل سیل ،اقتصادی کرائم برانچ کے لئے کام کر چکے ہیں ۔با لا جی شریواستو مشرقی دہلی کے ڈی سی پی بھی رہ چکے ہیں۔انہوں نے ایڈیشنل ڈی جی /انڈمان اور نکوبار ٹاپو کے طور پر بھی کام کیا جبکہ وہ 9سال تک کیبینیٹ سکریٹریٹ کی سروس اور حساس کاموں کو سنبھال چکے ہیں ۔انہوں نے سینٹ اسٹیفنس کالج ،دہلی یونیورسٹی سے اکنامکس (آنرس) کیا اور اس کے بعددہلی اسکول آف اکنامکس سے ایم اے اور ایل ایل بی دہلی یونیورسٹی سے کیا۔ بالا جی شریواستو سے سینئر دہلی پولیس میں 1987بیچ کے 2 افسران تاج حسن اور ستیندر گرگ بھی ہیں لیکن پولیس کمشنر عہدے کی ذمہ داری انہیں دی گئی ۔
حال ہی میں وہ اس وقت سرخیوں میں آئے تھے جب ایک جوائنٹ کمشنر کی شکایت انہیں دفتر میں کی گئی تھی ۔اس سے پہلے پولیس کمشنر بنے ایس این شریواستو 1985بیچ کے آئی پی ایس افسر ہیں ۔پچھلے سال دہلی فسادات کے وقت انہیں سی آر پی ایف سے اصل کیڈر میں واپس لاکر اسپیشل سی پی کی ذمہ داری دی گئی ۔28فروری 2020کو جب اس وقت کے پولیس کمشنر امولیہ پٹنائک سبکدوش ہوئے تو ایس این شریواستو کو پولیس کمشنر کا اضافی چارج سونپا گیا تھا۔ مئی 2021میں انہیں دہلی پولیس کا کمشنر تقرر کرنے کا لیٹر وزارت داخلہ کی طرف سے دیا گیا ۔ قیاس لگایا جا رہا تھا انہیںسروس ایکسٹینشن کا فائدہ ملے گا لیکن بالا جی شریواستو کی تقرری ہونے کے ساتھ ہی اس طرح کی قیاس آرائیاں ختم ہوگئی ہیں۔
