نئی دہلی: دہلی میں ہوا کا معیار ہفتہ کی صبح مسلسل تیسرے دن ‘شدید زمرہ’ میں رہا اور صبح 8:30 بجے ایئر کوالٹی انڈیکس (اے کیو آئی) 504 ریکارڈ کیا گیا۔
قومی دارالحکومت میں پی ایم 2.5 عالمی ادارہ صحت کی حد سے 80 گنا زیادہ رہا۔ دہلی میں پی ایم 2.5 کا کنسنٹریشن 354 ہے، جب کہ دہلی-این سی آر کے زیادہ تر علاقوں میں پی ایم 10 کا کنسنٹریشن 552 ہے، جو کہ 60 مائیکروگرام فی کیوبک میٹر کی محفوظ حد سے زیادہ ہے۔
دریں اثنا، دہلی کے لیفٹیننٹ گورنر وی کے سکسینہ نے شہر میں بگڑتے ہوئے ہوا کے معیار کا جائزہ لینے کے لیے کل ایک ہنگامی میٹنگ کی صدارت کی اور صورتحال کو تشویشناک قرار دیا۔ میٹنگ میں عبوری اقدامات پر تبادلہ خیال کیا گیا، جس میں عام لوگوں سے زیادہ سے زیادہ گھروں کے اندر رہنے اور اخراج اور دھول کی آلودگی کو کم کرنے کے لیے پبلک ٹرانسپورٹ کا استعمال کرنے کی اپیل بھی شامل ہے۔ لیفٹیننٹ گورنر نے فضائی آلودگی کے بحران کو کم کرنے کے لیے ایک طویل مدتی پائیدار ایکشن پلان بنانے کی ضرورت کا اعادہ کیا۔
دہلی کے لیے ایئر کوالٹی ارلی وارننگ سسٹم کی طرف سے جاری کردہ پیشین گوئی کے مطابق، آج صبح ہلکی دھند کے ساتھ ہوا کی رفتار تقریباً چھ سے آٹھ کلومیٹر فی گھنٹہ رہنے کا امکان ہے۔ اس کے علاوہ، نوئیڈا میں ہوا کا معیار 576 کی اے کیو آئی کے ساتھ ‘شدید’ زمرے میں رہا۔
مزید پڑھیں: نیتن یاہو حکومت غزہ میں فلسطینیوں کو صفحہ ہستی سے مٹانا چاہتی ہے: برطانوی تاریخ دان
سی پی سی بی کے مطابق، سیکٹر 116 اور 62 میں اے کیو آئی بالترتیب 426 اور 428 ریکارڈ کیا گیا۔ اسی طرح، گڑگاؤں کی ہوا کا معیار 512 کے اے کیو آئی کے ساتھ ‘شدید’ زمرے میں رہا۔
(یو این آئی)
