چنڈی گڑھ (ایس این بی) :شرومنی اکالی دل کے صدر سکھبیر سنگھ بادل پر 2015 کے کوٹک پورہ فائرنگ معاملے کے ملزم کو تحفظ فراہم کرنے کا الزام لگاتے ہوئے عام آدمی پارٹی (اے اے پی) نے بادل پر اپنے ملوث ہونے اور ڈیرہ سچا سودا رام رحیم کے ساتھ اپنے تعلق کو واضح کرنے کا چیلنج کیا۔ عام آدمی پارٹی کے ترجمان مالویندر سنگھ کانگ نے جمعرات کو نامہ نگاروں کو بتایا کہ چونکہ جاری تحقیقات نے بادل کو گرو گرنتھ کی بے حرمتی کے بعد 2015 کے کوٹک پورہ فائرنگ کیس میں جوڑا ہے، اس لیے ایک خصوصی تحقیقاتی ٹیم (ایس آئی ٹی) نے نائب وزیر اعلیٰ بادل کو 30 اگست کو کوٹک پورہ فائرنگ معاملے میں پوچھ گچھ کے لیے طلب کیا ہے۔ انہوں نے کہا کہ جیسا کہ ایس آئی ٹی نے انہیں طلب کیا ہے ، ہمیں امید ہے کہ بادل واضح کریں گے کہ پرامن سکھ مظاہرین پر گولی چلانے کا حکم کس نے دیا تھا اور کس نے ڈیرہ سربراہ کے ساتھ سازش کی تھی اور پنجاب میں ان کی فلموں کی تشہیر بھی کی تھی۔ پنجاب کے عوام سکھبیر بادل کو ان کے گناہوں کو کبھی معاف نہیں کریں گے۔
کانگ نے بادل کی طرف سے لائی گئی شراب پالیسی میں بے ضابطگیوں کے الزامات کو مسترد کرتے ہوئے کہا کہ چونکہ بادل خاندان نے کئی دہائیوں سے پنجاب کو لوٹا ہے، پنجاب کے عوام نے بھی انہیں مسترد کر دیا ہے۔ انہوں نے ٹرانسپورٹ مافیا، ڈرگ مافیا، کیبل مافیا اور مائننگ مافیا کی سرپرستی کی، ان کی مذموم پالیسیوں کی وجہ سے آج پنجاب بہت زیادہ قرضوں میں ڈوبا ہوا ہے ۔ کانگریس پر تنقید کرتے ہوئے کانگ نے کہا کہ اکالی دل اور کانگریس پنجاب کو لوٹنے اور اپنا خزانہ بھرنے کے لیے ملی بھگت کر رہے ہیں۔ انہوں نے کہا کہ دونوں نے گرو گرنتھ صاحب کی بے حرمتی اور کوٹک پورہ اور بہبل کلاں میں پولیس فائرنگ کے مجرموں کو محفوظ راستہ دیا لیکن اب وزیر اعلیٰ بھگونت مان کی قیادت والی پنجاب حکومت ’سکھ سنگت‘ اور پنجاب کے عوام کو انصاف دلائے گی۔
