اسد مرزا
’فلسطینی اتھارٹی کے وزیر اعظم محمد اشتیہ نے پیر،26فروری کو اپنی حکومت کے مستعفی ہونے کا اعلان کیا، جسے امریکہ کی طرف سے اسرائیل-فلسطین تنازع کو حل کرنے کے اپنے تازہ ترین اہم منصوبوں کے حصے کے طور پر اصلاحاتی عمل کے پہلے قدم کے طور پر دیکھا جارہا ہے۔‘
اپنے استعفیٰ کا اعلان کرتے ہوئے، وزیر اعظم محمد اشتیہ نے کہا کہ ’غزہ کی پٹی کی نئی حقیقت‘ سے نمٹنے کے لیے نئے انتظامات کی ضرورت ہے۔PAکے صدر محمود عباس نے اشتیہ کا استعفیٰ قبول کر لیا ہے اور توقع ہے کہ محمد مصطفی ان کی جگہ لیں گے۔ مصطفی ایک امریکی تعلیم یافتہ ماہر اقتصادیات ہیں جو عالمی بینک میں اعلیٰ عہدوں پر فائز رہ چکے ہیں اور اس وقت فلسطین انویسٹمنٹ فنڈ کی قیادت کرتے ہیں۔ وہ 2013-2015 تک نائب وزیر اعظم اور وزیر اقتصادیات رہے ہیں۔مزید یہ کہ مصطفی کو سیاسی طور پر آزاد تصور کیا جاتا ہے ، نہ کہ اشتیہ جیسے الفتح کا وفادار، مصطفی کی تقرری کا ممکنہ طور پر امریکہ، اسرائیل اور دیگر ممالک خیرمقدم بھی کرسکتے ہیں۔ مصطفی کی اپنی کوئی سیاسی بنیاد نہیں ہے اور 88 سالہ عباس اب بھی کسی بھی بڑی پالیسی پر حتمی فیصلہ کریں گے، یہ مشکوک ہے۔ پھر بھی، اس تقرری سے ایک اصلاح شدہ، پیشہ ور PA کی تصویر سامنے آسکتی ہے جو غزہ کو نئی انتظامی حکومت دے سکتا ہے، جو کہ امریکہ کے لیے ایک اہم ترجیح ہے۔امریکی محکمہ خارجہ کے ترجمان میتھیو ملر نے کہا کہ یہ فلسطینیوں پر منحصر ہے کہ وہ اپنے قائدین کا انتخاب کریں، لیکن امریکہ PA میں ’’اصلاحات اور احیاء‘‘ کے لیے کسی بھی اقدام کا خیرمقدم کرتا ہے۔’’ہم سمجھتے ہیں کہ یہ اقدامات مثبت ہیںاوریہ فلسطینی اتھارٹی کے تحت غزہ اور مغربی کنارے کو دوبارہ متحد کرنے کے لیے ایک اہم قدم ہے۔‘‘ لیکن اس کے ساتھ ہی PAفلسطینی عوام میں PAکی قانونی حیثیت کی دیرینہ کمی اور اسرائیل کے ساتھ اس کے کشیدہ تعلقات کو دور کرنے کیلئے بہت کم کام کرسکتا ہے۔ PA اسرائیل کے زیر قبضہ مغربی کنارے کے کچھ حصوں کا انتظام کرتا ہے اور پی اے جنگ کے بعد غزہ پر حتمی ریاست کا درجہ دینے سے پہلے عبوری حکومت قائم کرنے کا مطالبہ کرتا ہے۔ اتنا ہی نہیں بلکہ PA مان رہا ہے کہ غزہ میں جنگ حماس کی شکست کے ساتھ ختم ہو جائے گی جو کہ ایک اسرائیلی اور امریکی ہدف بھی ہے،لیکن تقریباً 5ماہ تک جاری رہنے والی خوفناک جنگ میں ناکام نظر آتا ہے جس نے تقریباً 30,000 فلسطینیوں کو ہلاک کیا اور علاقے کو قحط کے دہانے پر دھکیل دیا ہے۔
فلسطینی اتھارٹی کیا ہے؟: PA کو 1990 کی دہائی کے اوائل میں اسرائیل اور فلسطین لبریشن آرگنائزیشن کے درمیان عبوری امن معاہدوں کے ذریعے تشکیل دیا گیا تھا، جس کی قیادت یاسر عرفات نے کی تھی۔اسے مغربی کنارے اور غزہ کے کچھ حصوں میں محدود خودمختاری دی گئی تھی تاکہ فلسطینیوں کو دونوں علاقوں کے ساتھ ساتھ مشرقی یروشلم میں شامل کرکے مکمل ریاست کا درجہ حاصل کیا جاسکے، یہ وہ سرزمین ہے جس پر اسرائیل نے 1967 کی مشرق وسطیٰ کی جنگ میں قبضہ کر لیا تھا۔ لیکن فریقین امن مذاکرات کے کئی دور کے ذریعے کسی حتمی معاہدے تک پہنچنے میں ناکام رہے ہیں۔ محمود عباس، عرفات کی موت کے چند ماہ بعد 2005 میں پی اے کے صدر منتخب ہوئے تھے۔ حماس نے اگلے سال پارلیمانی انتخابات میں بھاری اکثریت سے کامیابی حاصل کی، جس سے PA کے بین الاقوامی بائیکاٹ کا آغاز ہوا۔عباس کی سیکولر الفتح پارٹی اور حماس کے درمیان اقتدار کی کشمکش 2007 کے موسم گرما میں آپسی لڑائی کی شکل میں سامنے آئی، حماس نے ایک ہفتے تک غزہ کی سڑکوں پر لڑائی کے بعد غزہ میں اقتدار پر قبضہ کر لیا۔ اس نے مؤثر طریقے سے عباس کے اختیار کو اسرائیل کے زیر قبضہ مغربی کنارے کے کچھ حصوں تک محدود کر دیا۔ عباس اسرائیل کو تسلیم کرتے ہیں، مسلح جدوجہد کے مخالف ہیں اور دو ریاستی حل کے لیے پرعزم ہیں۔ PA کی سیکورٹی فورسز نے حماس اور دیگر مسلح گروپوں کے خلاف کریک ڈاؤن کرنے کے لیے اسرائیلی فوج کے ساتھ تعاون بھی کیا ہے، اور اس کی حکومت نے اسرائیل کے ساتھ کام کے پرمٹ، طبی سفر اور دیگر شہری امور میں سہولت فراہم کرنے کے لیے بھی کام کیا ہے۔
فلسطینی ،PA کو کس نظر سے دیکھتے ہیں؟: حالیہ برسوں میں عباس کی مقبولیت میں کمی آئی ہے،مختلف انتخابات کے دوران مسلسل یہ پایا گیا ہے کہ فلسطینیوں کی ایک بڑی اکثریت چاہتی ہے کہ وہ استعفیٰ دیں۔ اسرائیل کے ساتھ PA کا سیکورٹی کوآرڈینیشن انتہائی غیر مقبول ہے، جس کی وجہ سے بہت سے فلسطینی اسے قبضے کے ذیلی ٹھیکیدار کے طور پر دیکھتے ہیں۔PA اور حماس دونوں نے اپنے زیر کنٹرول علاقوں میں اختلاف رائے کے خلاف کریک ڈاؤن کیا ہے، مظاہروں کو پرتشدد طریقے سے دبایا اور ناقدین کو جیل بھیجا اور تشدد کا نشانہ بنایا ہے۔ عباس کا مینڈیٹ 2009 میں ختم ہو گیا تھا لیکن انہوں نے اسرائیلی پابندیوں کا حوالہ دیتے ہوئے انتخابات کرانے سے انکار کر دیا تھا۔ حماس جس کی مقبولیت تشدد کے اس اور پچھلے دور کے دوران بڑھی ہے، ممکنہ طور پر کسی بھی آزاد انتخابات میں اچھی کارکردگی کا مظاہرہ کرسکتی ہے، لیکن اب تک کے سب سے زیادہ مقبول فلسطینی رہنما الفتح کے مروان برغوتی ہیں،جو 2004 میں دہشت گردی کی سزا کے بعد اسرائیلی جیل میں 5سال سے عمر قید کی سزا کاٹ رہے ہیں۔حماس 7 اکتوبر کے حملے میں گرفتار کیے گئے کچھ اسرائیلی یرغمالیوں کے بدلے مروان کی رہائی کا مطالبہ کر رہی ہے جس نے جنگ کو ہوا دی تھی، لیکن اسرائیل نے انھیں چھوڑنے سے صاف انکار کر دیا ہے۔ حماس نے تمام فلسطینی دھڑوں سے مطالبہ کیا ہے کہ وہ انتخابات سے قبل ایک عبوری حکومت قائم کریں، لیکن اسرائیل، امریکہ اور دیگر مغربی ممالک ممکنہ طور پر اس فلسطینی تنظیم کا بائیکاٹ کریں گے جس میں عسکریت پسند گروپ شامل ہے، جسے وہ ایک دہشت گرد تنظیم کے طور پر دیکھتے ہیں۔
کیا اسرائیل فلسطینی اتھارٹی کی حمایت کرتا ہے؟: اسرائیل حماس پر PA کو ترجیح دیتا ہے، اگرچہ وہ سیکورٹی کے معاملات پر تعاون کرتے ہیں،پھر بھی اسرائیل PA پر دہشت گردی کو ہوا دینے کا الزام لگاتا ہے اور PA اسرائیل پر نسل پرستی اور نسل کشی کا الزام لگاتا ہے۔ اسرائیل کی تنقید زیادہ تر PA کی طرف سے ان خاندانوں کو مالی امداد کی فراہمی پر مرکوز ہے جو یا تو اسرائیل کی قید میں ہیں یا اسرائیلی فورسز کے ہاتھوں مارے جاچکے ہیں۔ بشمول عسکریت پسند جنہوں نے اسرائیلیوں کو قتل کیاتھا ۔ اسرائیل کا کہنا ہے کہ یہ رقم دہشت گردی کو فروغ دیتی ہے۔ PA انہیں قبضے کے متاثرین کے لیے سماجی بہبود کے طور پر پیش کرتا ہے۔ اسرائیلی وزیراعظم نیتن یاہو نے کہا ہے کہ غزہ کے بعد جنگ میں PA کا کوئی کردار نہیں ہونا چاہیے۔ ان کا کہنا ہے کہ اسرائیل علاقے پر کھلے عام سیکورٹی کنٹرول برقرار رکھے گا جب کہ مقامی فلسطینی رہنما شہری امور کا انتظام کریں گے۔ نیتن یاہو کی حکومت فلسطینی ریاست کے قیام کی مخالف ہے۔ امریکہ نے جنگ کے بعد ایک وسیع تصفیہ کے حل کے لیے ایک نیا خاکہ پیش کیا ہے جس کے تحت سعودی عرب اسرائیل کو تسلیم کرسکتا ہے اور دیگر عرب ریاستیں بھی اس پہل میں شامل رہیں گی اور غزہ کی تعمیر نو اور حکومت کرنے میں مدد کرنے کے لیے ایک احیا شدہ PA قائم کیا جاسکتا ہے۔ یہ سب کچھ ایک آزاد فلسطینی ریاست کے لیے قابل اعتبار نقشہ تیارکرنے کے لیے ہے۔ لیکن PA اصلاحات کے اس پیکج کی زیادہ حمایت نہیں کرتا ہے۔ مجموعی طور پر امریکہ اب دو ریاستی منصوبے پر کام کرتا نظر آرہا ہے۔لیکن اس منصوبے کو نیتن یاہو نے سردست مسترد کردیا ہے۔ایسی صورتِ حال میں اگر PA کو ایک نئی شکل میں عوام کے سامنے زیادہ اختیارات اور حقوق کے ساتھ پیش کیا جائے تو غالباً تصفیہ کا حل جلد ممکن ہے اور پھر کچھ عرصے بعد دو ریاستی حکومت پر کام کیا جاسکتا ہے، لیکن زیادہ تر عرب ممالک اس منصوبے کی مخالفت کرتے ہیںاور حماس بھی یہ کہہ کر اس کو مسترد کرتا ہے کہ اس کی لڑائی کا اصلی مقصد نئی فلسطینی ملکی حکومت قائم کرنا ہے، نہ کہ PAجیسے مفلوج زدہ ادارے کو آگے بڑھانا۔
(مضمون نگارسینئر سیاسی تجزیہ نگار ہیں، ماضی میں وہ بی بی سی اردو سروس اور خلیج ٹائمزدبئی سے بھی وابستہ رہ چکے ہیں)
