کولمبو(ایجنسیاں) :سری لنکا کے صدر گوٹابایا راج پکسے نے جمعرات کو پارلیمنٹ کے اسپیکر کو اپنا استعفیٰ ای میل کر دیا۔ بدھ کو اپنی اہلیہ کے ساتھ سری لنکا سے فرار ہونے والے راج پکسے کو نجی دورے پر سنگاپور میں داخل ہونے کی اجازت دے دی گئی ہے۔ سنگاپور کی وزارت خارجہ کے مطابق راج پکسے نے نہ تو سیاسی پناہ کی درخواست کی ہے اور نہ ہی انہیں پناہ دی گئی ہے۔ وہ ‘نجی دورے’ پر سنگاپور آئے ہیں۔
سری لنکا کی پارلیمنٹ کے ا سپیکر مہندا یاپا ابھے وردنے نے جمعرات کو گوٹابایا راج پکسے کو مطلع کیا کہ وہ جلد از جلد صدر کے عہدے سے استعفیٰ دے دیں، ورنہ وہ انہیں ہٹانے کے لیے دوسرے متبادل پر غور کریں گے۔ انتباہ کے بعد، راج پکسے نے جمعرات کو اپنا استعفیٰ بھیج دیا۔راجا پاکسے مالے کے شہر مالے میں ایک دن گزارنے کے بعد سنگاپور پہنچے ہیں۔ سری لنکا کی معیشت کو سنبھالنے میں حکومت کی ناکامی کے خلاف عوامی بغاوت پھوٹ پڑنے کے چند دن بعد راج پکسے ملک سے فرار ہو گئے۔ میڈیا کے سوالات کا جواب دیتے ہوئے، سنگاپور کی وزارت خارجہ کے ترجمان نے تصدیق کی کہ راجا پاکسے کو ’نجی دورے کے لیے سنگاپور میں داخل ہونے کی اجازت دی گئی ہے‘۔ ترجمان نے کہا کہ راجا پاکسے نے نہ تو سیاسی پناہ کی درخواست دی ہے اور نہ ہی انہیں پناہ دی گئی ہے۔73 سالہ راج پکسے نے بدھ کو عہدہ صدارت سے مستعفی ہونے کا وعدہ کیا تھا۔ ملک چھوڑنے کے چند گھنٹے بعد ہی وزیر اعظم رانیل وکرما سنگھے کو قائم مقام صدر مقرر کر دیا گیا اور اس کے ساتھ ہی ملک میں سیاسی بحران مزید گہرا ہو گیا اور مظاہروں کا ایک نیا دور شروع ہو گیا۔راج پکسے نے اعلان کیا کہ وہ بدھ کے روز مستعفی ہو جائیں گے جب مظاہرین نے ہفتے کے روز راشٹرپتی بھون پر دھاوا بول دیا۔ مظاہرین کا خیال ہے کہ ملک کے بے مثال معاشی بحران کے ذمہ دار راج پکسے ہیں، جس کی وجہ سے ملک کی حالت ابتر ہوئی ہے۔دوسری جانب سری لنکا میں حکومت مخالف مظاہرے جاری ہیں۔ پولیس اورمظاہرین کے درمیان جھڑپوں میں 2 افراد ہلاک اور100 سے زائد زخمی ہوگئے۔ حکومت نے مظاہرین سے نمٹنے کے لئے فوج طلب کرلی۔ سری لنکا میں غیرمعینہ مدت کے ایمرجنسی نافذ ہے۔سری لنکا میں بدترین معاشی بحران کے بعد حکمران اشرافیہ کے خلاف شدید احتجاج اورمظاہرے جاری ہیں اور عوام کو سنگین معاشی بحران کے باعث گزشتہ کئی ماہ سے بدترین لوڈشیڈنگ، ایندھن، خوراک، دواؤں اور دیگر بنیادی ضروریات کی شدید قلت کا سامنا ہے۔دریں اثنا سری لنکائی فوج نے جمعرات کو کولمبو میں حکومت مخالف مظاہرین کو پہلی وارننگ جاری کی۔وارننگ جاری کرتے ہوئے کہا گیا ہے کہ وہ فوری طور پر ہر قسم کے تشدد سے باز رہے ورنہ نتائج بھگتنے کے لیے تیار رہیں۔مسلح افواج نے ایک بیان میں کہاکہ “یہ ان کی ذمہ داری ہے کہ وہ عوامی املاک، اہم تنصیبات، حساس مقامات اور انسانی جانوں کی حفاظت کریں اور اگر صورتحال ہاتھ سے نکلتی ہوئی نظر آتی ہے تو طاقت کے استعمال سے نہیں ہچکچائیں گے “۔
فوج کا یہ بیان پرتشدد مظاہرین کے کولمبو میں وزیر اعظم کے دفتر اور پارلیمنٹ ہاؤس پر اسی طرح کی کوششوں کے بعد سامنے آیا ہے ۔ ایسی اطلاعات بھی موصول ہوئی ہیں کہ نامعلوم مظاہرین نے دو جوانوں پر حملہ کر کے انہیں شدید زخمی کر دیا اور ان کی ٹی-56 اسالٹ رائفلیں لوٹ لیں۔بیان میں کہا گیا ہے کہ مسلح افواج نے اس ہفتے حکومت مخالف مظاہروں میں مداخلت نہیں کی، جب 9 جولائی کو ہجوم نے راشٹرپتی بھون پر قبضہ کر لیا تھا اور صدر گوتابایا راج پکسے کو بھاگنے پر مجبور ہوئے تھے ۔ مسٹر راج پکسے آج اپنی اہلیہ کے ساتھ مالدیپ سے سنگاپور کے لیے روانہ ہوئے ۔بیان کے مطابق چیف آف ڈیفنس اسٹاف، آرمی کے تینوں کمانڈرز اور انسپکٹر جنرل آف پولیس نے تین سے زائد مواقع پر احتجاج کرنے والے گروپوں سے عوامی سطح پر مسائل کا آئینی حل تلاش کرنے کی اپیل کی تھی۔
دوسری جانب سری لنکا میں جمعرات کو مظاہرے کے دوران سیکورٹی فورسز کی کارروائی میں ایک مظاہرین کی موت ہو گئی اور دو فوجی شدید زخمی ہو گئے ۔ یہ اطلاع میڈیا رپورٹس اور حکام نے دی۔بی بی سی کی رپورٹ کے مطابق، پولیس نے مظاہرین پر آنسو گیس فائر کی، جس سے سانس لینے میں دشواری کا شکار ایک 26 سالہ شخص ہلاک ہو گیا۔بدھ کی صبح صدر گوٹابایا راج پکسے کے ملک چھوڑنے کے بعد وزیر اعظم رانیل وکرما سنگھے کو قائم مقام صدر مقرر کیا گیا تھا۔
وکرما سنگھے نے کولمبو سمیت مغربی صوبے میں کرفیو کا اعلان کرتے ہوئے سیکورٹی فورسز کو شرپسندوں سے نمٹنے کا حکم دیا۔کولمبو کے نیشنل ہسپتال نے کہا کہ زیادہ تر زخمی مظاہرین وزیر اعظم کے دفتر یا پارلیمنٹ کے باہر تھے ۔دریں اثنا، سری لنکا کی فوج نے کہا کہ بدھ کی شام بٹمولہ میں پارلیمنٹ کے قریب مظاہرین نے دو فوجیوں پر حملہ کیا۔فوج کے میڈیا کے ترجمان بریگیڈیئر نیلانتھا پریمارتنے نے کہا کہ مظاہرین نے دو فوجیوں سے دو خودکار ہتھیاروں سے فائرنگ کی۔ٹی-56 اسالٹ رائفلیں اور گولہ بارود چھین لیا گیا۔
