نئی دہلی (یو این آئی) : ہندوستان نے مہابلی پورم میں منعقد ہونے والے 44 ویں شطرنج اولمپیاڈ میں مقابلے کے اوپن زمرے میں تیسری ٹیم کو میدان میں اتار کر اب تک کی سب سے زیادہ شراکت درج کی۔ آل انڈیا شطرنج فیڈریشن (اے آئی سی ایف) نے اتوار کو یہ اطلاع دی۔ واضح رہے کہ ہر ملک پانچ کھلاڑیوں کی صرف ایک ٹیم کو میدان میں اتار سکتا ہے (ہر راؤنڈ میں چار کھلاڑی)، لیکن میزبان کے طور پر ہندوستان ہر زمرے میں کم از کم دو ٹیمیں بھیج سکتا ہے ۔ ہندوستان زیادہ سے زیادہ تین ٹیموں کو میدان میں اتارنے کا حق رکھتا ہے اگر حصہ لینے والے ممالک کی کل تعداد طاق ہو۔ ہندوستان میں مقابلہ کے لیے 187 ٹیموں کو رجسٹریشن کرائی گئی ہے جو اولمپیاڈ کی تاریخ میں سب سے زیادہ رجسٹریشن ہے ۔ بین الاقوامی شطرنج فیڈریشن (ایف آئی ڈی ای) نے میزبان ملک کی تیسری ٹیم کو معیار کے مطابق داخلوں کی تعداد برابر کرنے کی منظوری دی۔
خواتین کے زمرے میں اب تک سب سے زیادہ 162 انٹریز موصول ہو چکی ہیں۔ ہندوستان پہلی بار اس زمرے میں دو ٹیمیں بھیجے گا۔ ہندوستان کی تیسری ٹیم گرینڈ ماسٹر سوریا شیکھر گنگولی، کارتیکیان مرلی، ایس پی سیتھورامن، ابھیجیت گپتا اور ابھیمنیو پرانک پر مشتمل ہے ۔یہ دونوں ٹیم گجرات کے پہلے گرینڈ ماسٹر تیجس باکرے کی کپتانی میں اولمپیاڈ میں اتریں گی۔ اے آئی سی ایف کے سکریٹری اور اولمپیاڈ کے ڈائریکٹر بھرت سنگھ چوہان نے کہاکہ یہ ہندوستان کو اب تک کا بہترین تحفہ ملا ہے ۔ یہ تصور کرنا مشکل ہے کہ ایک اولمپیاڈ میں 25 ہندوستانی ایک ساتھ مقابلہ کریں گے ۔ اولمپیاڈ کے منتظمین (اے ایف آئی) اور آل انڈیا شطرنج فیڈریشن (اے آئی سی ایف) کے افسران کے طور پر یہ ہم سب کے لیے قابل فخر لمحہ ہے ۔
