نئی دہلی (ایس این بی) : اناو ضلع کے ایک قتل کیس میں سپریم کورٹ نے پولیس کی تفتیش مقامی پولیس سے چھین کر انسپکٹر جنرل آف پولیس کو سونپ دی ہے۔ انٹیلی جنس بیورو کے آئی جی پی بھگوان سوروپ سے کہا گیا ہے کہ وہ ذاتی طور سے اناو کے بنگارماو پولیس اسٹیشن میں 17سالہ محمد فیضل کے قتل کی تحقیقات کریں۔عدالت عظمی نے انہیں چھ ہفتوں کے اندر سپریم کورٹ کو رپورٹ پیش کرنے کو کہا ہے۔ پھل فروش محمد فیصل کو 21 مئی 2021 کو بانگرو ماﺅ تھانے میں قتل کر دیا گیا تھا۔ ان کی والدہ نسیمہ نے مقامی پولیس پر تحقیقات میں ہیرا پھیری کا الزام لگایا تھا۔ جسٹس اجے رستوگی اور جسٹس بیلا ایم ترویدی کی بنچ نے مشاہدہ کیا کہ انکوائری افسر کی طرف سے کی گئی تحقیقات کو غیر جانبدارانہ نہیں کہا جا سکتا۔ ریاست میں کورونا وائرس کی پابندیوں کی خلاف ورزی کرنے پر پولیس کی حراست میں لڑکے پر مبینہ طور پر حملہ کیا گیا تھا۔اس کے ساتھ ہی عدالت عظمیٰ نے آٹھ ہفتوں کے اندر رپورٹ پیش کرنے کا حکم دیتے ہوئے سماعت 18جولائی کے لئے ملتوی کردی ہے۔ سپریم کورٹ کے جسٹس اجے رستوگی اور بیلا ترویدی نے درخواست گزار کے الزامات میں میرٹ پایا اور کہا کہ بانگروماو کے عدالتی مجسٹریٹ کی نگرانی میں کی گئی تحقیقات غیر جانبدارانہ نہیں تھی۔ الہ آباد ہائی کورٹ کی لکھنو بنچ نے بھی عرضی گزار کے الزامات پر غور نہیں کیا۔ محمد فیصل کے جسم پر 14 مقامات پر شدید چوٹوں کے نشانات تھے۔ پوسٹ مارٹم رپورٹ میں شدید زخمی ہونے کے باوجودمقامی پولیس نے آئی پی سی کی دفعہ 304 کے تحت غیر ارادتن مقدمہ چلانے کے لئے حوالدار وجے چودھری اور ہوم گارڈ ستیہ پرکاش کے خلاف چارج شیٹ داخل کی تھی۔ حالانکہ ہائی کورٹ کے حکم کے بعد سیشن کورٹ نے ملزمان کے خلاف قتل کا الزام عائد کیا تھا۔
سپریم کورٹ نے کہا ہے کہ منصفانہ تفتیش فوجداری انصاف کے نظام کی ریڑھ کی ہڈی ہے اور تحقیقات کا مقصد سچائی کا پتہ لگانا ہے تاکہ عدالت میں منصفانہ ٹرائل کے ذریعے انصاف کے ہدف کو پورا کرنے میں مدد مل سکے۔ بنچ نے کہا، ’اس کے علاوہ جرم کی منصفانہ تحقیقات کو یقینی بنانے کی ضرورت بلاشبہ ضروری ہے، کیونکہ یہ متاثرہ کے حقوق اور ہر شہری کے بنیادی حقوق کا ایک سطح پر تحفظ کرتا ہے تاکہ اس بات کو یقینی بنایا جا سکے کہ جرم کی تفتیش کی جائے۔ عدالت عظمیٰ نے اس معاملے میںمشاہدہ کیا کہ دستاویزات کا جائزہ لینے کے بعد، یہ پہلی نظر میں ہے کہ درخواست گزار کی شکایت اس عدالت میں زیر غور ہے۔ بنچ نے کہا، ہمارے پاس یہ اختیار ہے کہ یا تو اس معاملے کو دوبارہ جانچ کے لیے سی بی آئی کو بھیجیں، لیکن فریقین کے وکیل کو سننے کے بعد، اس مرحلے پر مناسب سمجھیں کہ سینئر پولیس افسر بھگوان سوروپ، انسپکٹر جنرل آف پولیس، انٹیلی جنس، ہیڈ کوارٹر، لکھنو ذاتی طور پر درخواست گزار کی طرف سے کی گئی شکایت کی غیر جانبدارانہ طریقے سے مزید تفتیش کرے گا۔ سپریم کورٹ نے کہا کہ قتل کی تحقیقات غیر جانبداری سے نہیں کی گئی۔ منصفانہ تفتیش فوجداری نظام انصاف کی ریڑھ کی ہڈی اور متاثرہ کا آئینی حق ہے۔ گواہوں اور اب تک کی تفتیش کو دیکھیں تو یہ واضح ہے کہ سپریم کورٹ کو مداخلت کرنے کی ضرورت ہے۔ سپریم کورٹ نے کہا کہ ہمارے پاس دو آپشن ہیں کہ یا تو ہم سی بی آئی کو دوبارہ تفتیش کرنے کا حکم دیں یا پھر تفتیش کسی سینئر پولیس افسر کو سونپ دیں، اس لیے انٹیلی جنس ڈپارٹمنٹ کے آئی جی پی بھگوان سوروپ کو تحقیقات کی ذمہ داری سونپی گئی ہے۔ مقامی پولیس کو ہدایت کی گئی ہے کہ وہ سات دنوں میں تفتیش سے متعلق تمام دستاویزات آئی جی پی کے حوالے کرے۔ عدالت عظمیٰ نے کہا کہ آٹھ ہفتوں کے اندر رپورٹ اس عدالت میں پیش کی جائے۔ ریاستی سرکار کو تمام کاغذات بشمول چارج شیٹ اور دیگر مواد سات دنوں کے اندر افسر کے حوالے کرنے اور ضرورت پڑنے پر تمام مدد فراہم کرنے کی ہدایت دی گئی ہے۔سماعت کی اگلی تاریخ 19 جولائی مقرر کی گئی ہے۔
