13رکنی وفد کی تیار کردہ رپورٹ میں پولیس کے طرز عمل پر کئی سوال، فرقہ پرست قوتوں کے خلاف عوام سے متحد ہونے کی اپیل
نئی دہلی (ایس این بی) : بائیں بازو کی جماعتوں سی پی آئی (ایم)، سی پی آئی، سی پی آئی( ایم ایل)، فارورڈ بلاک کی ایک فیکٹ فائنڈنگ ٹیم نے جہانگیر پوری ۔سی بلاک کے فرقہ وارانہ تشدد سے متاثرہ علاقوں کا دورہ کیا۔ دونوں برادریوں کے لوگوں یعنی متاثرہ علاقے کے مکینوں سے بات کرنے کے بعد رپورٹ تیار کی گئی ہے۔ وفد نے کم از کم 50 خاندانوں سے بات چیت کی۔ وفد نے جہانگیر پوری تھانہ علاقہ کے ایڈیشنل ڈی سی پی شری کشن کمار اور تھانہ کے دیگر پولیس اہلکاروں سے بھی ملاقات کی۔
اس 13رکنی وفد میں راجیو کنور ،سی پی آئی (ایم)،آشا شرماسکریٹری جے ایم ایس،میمونہ مولاصدر جے ایم ایس،وپن ایل سی سکریٹری شمالی ضلع، سی پی آئی (ایم)،سنجیو، نائب صدرڈی وائی ایف آئی ، سبھاش ڈی وائی ایف آئی،روی رائے سکریٹری، سی پی آئی (ایم ایل)،شویتا راج ایکٹوسٹ، پرسن جیت جنرل سکریٹری اے آئی ایس اے ، کمال پریت وکیل، امت فارورڈ بلاک، وویک سریواستو سی پی آئی اور سنجیو رانا سی پی آئی شامل تھے۔فیکٹ فائنڈنگ رپورٹ میں پولیس کے طرز عمل پر بھی سوال کھڑے کئے گئے ہیں ۔
فیکٹ فائنڈنگ رپورٹ کے مطابق حقائق کی چھان بین کرنے والی ٹیم کو سب کی طرف سے صرف ایک بات معلوم ہوئی کہ ہنومان جینتی پر 150 سے 200 لوگ ہاتھوں میں ہتھیاروں سے لیس ہو کر جہانگیر پوری محلہ کی گلیوں میں مارچ کر رہے تھے، ہنومان جینتی پر دوپہر سے ہی مارچ کر رہے تھے۔لوگوں کا کہنا تھا کہ انہوں نے جلوس کے شرکا کو پستول اور تلواریں لہراتے ہوئے دیکھا، جس کی تصدیق مختلف ٹی وی چینلوں پر دکھائی جانے والی ویڈیوز سے ہوتی ہے۔ زور دار اور جارحانہ نعرے لگائے جا رہے تھے۔ ٹیم کو بتایا گیا کہ یہ مقامی لوگوں کی طرف سے منعقدہ جلوس نہیں تھا، بلکہ بجرنگ دل کے یوتھ ونگ نے نکالا تھا، جس میں زیادہ تر علاقے کے باہر کے لوگ شامل تھے۔ٹیم کو بتایا گیا کہ جلوس کے ساتھ 2 پولیس جیپیں بھی تھیں ۔ ایک جلوس کے آگے اور دوسری آخر میں، تاہم ہر جیپ میں صرف 2 پولیس اہلکار تھے۔
فیکٹ فائنڈنگ رپورٹ کے مطابق پہلا سوال یہ پیدا ہوتا ہے کہ پولیس نے مناسب انتظامات کیوں نہیں کیے؟ پولیس نے جلوس میں کھلے عام اسلحہ لے جانے کی اجازت کیوں دی؟ٹیم کو بتایا گیا کہ جلوس نے پہلے ہی بلاک سی جہانگیرپوری علاقہ کے 2 چکر لگائے تھے، جہاں زیادہ تر بنگالی بولنے والے مسلمان آباد ہیں۔ یہ واقعہ اس وقت پیش آیا جب جلوس تیسرا چکر لگ رہا تھا۔ اگر مقامی مسلم باشندوں کے جلوس پر حملہ کرنے کی کوئی ’سازش‘ ہوتی، جیسا کہ بی جے پی لیڈروں نے الزام لگایا تھا تو حملے پہلے ہو چکے ہوتے۔ حقیقت یہ ہے کہ یہ واقعات اس وقت پیش آئے جب جلوس ایک مسجد کے باہر بالکل اسی وقت رکا جب روزہ دار نماز کے لیے مسجد میں جمع تھے۔
دوسرا سوال یہ ہے کہ جلوس کو وہاں رکنے کی اجازت کیوں دی گئی؟ مسجد کے باہر نعرے لگانے کی اجازت کیوں دی گئی؟ دوسرے لفظوں میں، ایک مسلح جلوس کو مسجد کے باہر رکنے کی اجازت دی جاتی ہے، نعرے لگاتے ہوئے، جب روزہ ختم ہونے والا ہو اور جب مسلمانوں کا ہجوم جمع ہو۔ اگر ان واقعات کا تجزیہ کیا جائے تو یہ ایک سازش ہے جس میں پولیس خود ذمہ دار ہے۔
ٹیم کو بتایا گیا کہ دونوں طرف سے پتھراؤ شروع ہو گیا۔ ٹیم کو بتایا گیا کہ آس پاس کے لوگوں میں یہ خوف تھا کہ جلوس مسجد میں داخل ہو جائے گا اور پولیس کوئی کارروائی نہیں کر رہی ہے جس کی وجہ سے ایک بہت بڑا مجمع ہو گیا۔ کچھ لوگوں نے نام ظاہر نہ کرنے کی شرط پر یہ بھی کہا کہ یہ ہتھیار بعد میں اقلیتی برادری کے کچھ عناصر لائے تھے۔ مقامی لوگ اتنی بڑی تعداد میں جمع ہوئے کہ جلوس نکالنے والے ان کے سامنے بہت کم ہوگئے جس کی وجہ سے وہ بھاگ گئے۔
وفد نے کچھ کاریں اور ایک موٹر سائیکل دیکھیں جو جلی ہوئی تھیں۔ ہندوؤں کی دکان بھی لوٹ لی گئی۔ یہ بھی بتایا گیا کہ موقع پر پہنچی پولیس پتھراؤ میں پھنس گئی اور کچھ زخمی ہو گئے۔16 اپریل کی رات پولیس نے علاقے میں چھاپہ مارا اور اندھا دھند گرفتاریاں کیں۔ جب خواتین نے پولیس سے یہ جاننے کی کوشش کی کہ ان کے گھروں پر چھاپے کیوں مارے جا رہے ہیں تو مرد پولیس نے ان کے پیٹ میں گھونسہ مارا اور مارا پیٹا۔ٹیم تھانے چلی گئی۔ وہیں یہ دیکھ کر حیران رہ گئے کہ بی جے پی صدر آدیش گپتا، ایم پی ہنس راج ہنس پولیس اہلکاروں کی موجودگی میں تھانے کے احاطے میں پریس کانفرنس سے خطاب کر رہے تھے۔ ان کے اردگرد جئے شری رام کے نعرے لگ رہے تھے۔
تیسرا سوال یہ ہے کہ کیا اس سے پولیس کی جانبداری صاف ظاہر نہیں ہوتی؟ ٹیم نے پایا کہ پورے علاقے میں پولیس پر کوئی بھروسہ نہیں ہے۔ لوگوں کا ماننا ہے کہ یہ مکمل طور پر یک طرفہ، جانبدارانہ تفتیش تھی۔ یہ بھی واضح رہے کہ بی جے پی نے کھل کر پولیس کے کردار کی تعریف کی ہے۔ اس سلسلے میں پولیس کی طرف سے خاص طور پر اقلیتی برادری کے افراد کی یکطرفہ گرفتاری، اگرچہ اشتعال انگیز رویے اور جلوس کی جارحانہ کارروائیوں کے ویڈیو ثبوت دستیاب ہیں، مکمل طور پر بلاجواز اور محرک ہے۔وفد نے ایڈیشنل ڈی سی پی سے بات کی اور انہیں مسلم کمیونٹی کے نوجوانوں کو اندھا دھند اٹھانے سے پیدا ہونے والے پولیس کے متعصبانہ رویہ سے پیدا ہونے والے احساسات سے آگاہ کیا، جبکہ جلوس کے خلاف کوئی کارروائی نہیں کی گئی۔ وفد نے پولیس افسر کو مرد پولیس اہلکاروں کی جانب سے خواتین کے ساتھ بدسلوکی کی شکایات سے بھی آگاہ کیا۔
ٹیم نے پایا کہ علاقے میں رہنے والے لوگوں کے درمیان فرقہ وارانہ تصادم کا ایک بھی واقعہ نہیں ہوا۔ ہندو اور مسلمان کئی دہائیوں سے ایک ساتھ رہ رہے ہیں۔ یہ چونکا دینے والی بات ہے کہ بی جے پی میڈیا کے ذریعے انہیں ’’غیر قانونی‘‘ یا روہنگیا پناہ گزین کے طور پر فروغ دے رہی ہے۔ جب کہ وہ دہلی کے باوقار شہری ہیں۔
بائیں بازو کی جماعتوں نے عوام الناس سے اپیل کی ہے کہ فرقہ پرست قوتوں کے خلاف عوام کا اتحاد اور متحرک ہونا ہی واحد آپشن ہے۔ وقت کا تقاضا ہے کہ آر ایس ایس-بی جے پی کے منصوبوں کو کسی بھی طرح کامیاب نہ ہونے دیا جائے۔ ان کے پاس ملک کی معاشی حالت زار سے توجہ ہٹانے اور عوام کی روزی روٹی کے بحران، فرقہ وارانہ ہم آہنگی کے خاتمے کا آپشن ہے، ہمارا آپشن ہے کہ عوامی مسائل اور معاش کے بحران پر عوامی اتحاد اور عوامی جدوجہد سے قابو پانا ہے۔ فرقہ واریت کے خلافبائیں بازو کی پارٹی نے وزارت داخلہ اور صدر جمہوریہ سے مطالبہ کیا ہے کہ وہ بغیر کسی تاخیر کے دہلی پولیس کی طرفداری کی جانچ کریں۔ قصوروار پولیس اہلکاروں کے خلاف فوری کارروائی کی جائے۔ انہیں تفرقہ پھیلانے والی قوتوں کے خلاف فوری کارروائی کو یقینی بنانا چاہیے۔ ایسا کرنے میں جتنا زیادہ وقت لگے گا، اتنا ہی یقینی طور پر حکومت کی بے اعتباری ہوگی۔ دہلی کے لیفٹیننٹ گورنر کو اپنی خاموشی توڑتے ہوئے فوری مداخلت کرنی چاہیے۔
