نئی دہلی (ایس این بی) : عام آدمی پارٹی کے چیف ترجمان سوربھ بھاردواج نے کہا کہ ’آپ‘ نے اپریل میں انکشاف کیا تھا کہ بی جے پی کونسلر لوگوں کو لوٹ رہے ہیں۔ اب بی جے پی انتخابات میں شکست کے خوف کی وجہ سے پردہ پوشی کر رہی ہے۔ بی جے پی دہلی کے ریاستی صدر آدیش گپتا نے 3 کونسلروں کو ایک خط لکھا ہے کہ مالی بدعنوانی کی شکایات کی وجہ سے آپ کو 6 سال کے لیے پارٹی سے نکالاجا رہا ہے۔ ایسی صورت حال میں آدیش گپتا کو بتائیں کہ جب معاشی بدعنوانی کی شکایات تھی تو آپ اتنے عرصے سے کس چیز کا انتظار کر رہے تھے؟ پارٹی ہیڈ کوارٹر میں منعقد پریس کانفرنس میں سوربھ بھاردواج نے کہا کہ بی جے پی ایک بار پھر دہلی کے لوگوں کوبے وقوف بنانا چاہتی ہے ۔ بدعنوانی کے الزام کے بعد پارٹی سے ہٹانا کوئی کارروائی نہیں ہے جب تک کہ سی بی آئی ، اے سی بی اور ویجیلنس سے انکوائری کروانے کے بعد انہیں جیل بھیج نہ دیا جائے۔ بی جے پی نے ابھی دہلی میں ایک سروے کیا ہے جس کے مطابق ایم سی ڈی انتخابات میں بی جے پی کی 272 میں سے 45 سیٹیں بھی نہیں آرہی ہیں۔ آنے والے کارپوریشن انتخابات میں بی جے پی کو شکست کا سامنا کرنا پڑے گا۔ یہی وجہ ہے کہ بی جے پی اب ایک نیا ڈرامہ شروع کر رہی ہے۔
انہوں نے کہا کہ پچھلے ایک سال سے ہر ہفتے وہ بی جے پی کے زیر اقتدار میونسپل کارپوریشنوں میں بڑے پیمانے پر بدعنوانی کے بارے میں شواہد کے ساتھ انکشاف کر رہے ہیں۔ اب تک بی جے پی کے دو درجن کونسلروں کا ثبوتوں کے ساتھ انکشاف کیا گیا ہے کہ وہ کھلے عام کرپشن میں ملوث ہیں۔ عمارتوں کی تعمیر کے لیے ہر ایک کے عوض 5 لاکھ روپے وصول کیے جا رہے ہیں۔ ہر بار بی جے پی قیادت اور بی جے پی دہلی کے ریاستی صدر آدیش گپتا کہتے تھے کہ عام آدمی پارٹی جھوٹے الزامات لگاتی ہے لیکن اب 3 کونسلروں کو خود بی جے پی نے بدعنوانی کے الزام میں پارٹی سے باہر کردیے جانے پر ’آپ‘ کے الزام صحیح ثابت ہورہے ہیں۔
