چارٹرڈ جہازوں سے بیرون ممالک سے دس لاکھ سے زیادہ لوگ واپس لوٹے

کووڈ۔19 وبا پھیلنے کے بعد سے اب تک بیرون ممالک  میں پھنسے  سترہ لاکھ  سے  زیادہ ہندوستانی  واپس اپنے  ملک لوٹ چکے ہیں جن میں دس  لاکھ سے زیادہ چارٹرڈ جہازوں سے واپس  آئے  ہیں۔
وزارت شہری پرواز نے منگل کو جاری اعدادوشمار  کے مطابق ’وندے بھارت مشن‘  کے تحت پیر تک17,11,128   لوگ کووڈ کے دوران  بیرون ممالک سے ہندوستان  واپس لوٹے  ہیں۔ ان میں  10,08,108 چارٹرڈ جہازوں سے آئے  ہیں۔ اس کے علاوہ  ائر  انڈیا  اور ائر انڈیا ایکسپریس کی پروازوں سے 5,31,697 لوگ  واپس لوٹے ہیں۔ سڑک کے راستوں  سے   1,53,474 ہندوستانی  وطن واپس  ہوئے ہیں۔ بحریہ  کے  جہازوں  سے 3,987 ہندوستانی  واپس لائے  گئے ہیں۔
حکومت نے  06 مئی کو  وندے  بھارت مشن  کی ابتدا  کی تھی۔ اب تک  مشن کے چھ  مرحلے پورے ہوچکے  ہیں  جبکہ  ساتواں مرحلہ  جاری ہے۔ ابتدا  میں صرف ائرانڈیا  اورائر انڈیا ایکسپریس کی پروازوں کے  ہی مشن  کے  تحت اجازت  دی گئی تھی۔  لیکن بعد میں نجی ائرلائنس کو بھی  اس میں شراکت  دار بنایا گیا۔
واضح  رہےکہ کووڈ۔19   کو  پھیلنے سے  روکنے کے لئے  حکومت  نے  25 مارچ سے ملک میں سبھی طرح کی معمول  کے مسافر پروازوں  پر پابندی عائد کردی  تھی۔ دو مہینے بعد 25 مئی سے  گھریلو راستوں پر معمول کی  پروازیں  شروع کرنے کی  اجازت  دی  گئی ہے جبکہ بین الاقوامی  پروازوں پر پابندی جاری ہے۔