نئی دہلی: کانگریس نے وزیراعظم مودی کے ویڈیو کانفرنسگ کے ذریعہ عوام سے خطاب پر تبصرہ کرتے ہوئے کہا کہ وزیراعظم نریندر مودی نے آج صبح جب ملک سے خطاب کیا تو امید تھی کہ وہ منریگا کارڈ ہولڈروں، کسانوں، ڈاکٹروں اور طبی عملہ کے مفاد میں کوئی ٹھوس اعلان کریں گے لیکن ان امور پر خاموشی اختیارکرکے انہوں نے ملک کو مایوس کیا ہے۔
کانگریس کے ترجمان پون کھیڑا نے پریس کانفرنس میں کہا کہ گزشتہ دس دنوں میں ملک میں ضروری اشیا کی سپلائی متاثر ہوئی ہے اور لوگوں کو پوری طرح سے ضروری اشیا کی سپلائی نہیں ہو پا رہی ہے۔
تمام ریاستوں کی سرحدیں سیل ہیں اور 60فیصد ٹرک سڑکوں پر نہیں ہیں۔ترجمان نے کہاکہ سپلائی چین متاثر ہونے سے ملک میں مہنگائی بہت بڑھ گئی ہے۔ سبزی، دال، آٹا، چاول وغیرہ کی قیمتیں آسمان چھورہی ہیں۔ ٹرانسپورٹ لاگت کئی گنا بڑھ گئی ہے جس کی وجہ سے اشیا دو گنی قیمت پر فروخت ہورہی ہیں لیکن اس کا فائدہ کسان کو نہیں مل پارہا ہے۔
کانگریس کے سینئر لیڈر اور رکن پارلیمان ششی تھرور نے بھی آج وزیر اعظم مودی کے اس ویڈیو پیغام کی مذمت کی ہے، جس میں انہوں نے اتوار کی شب 9 بجے بتی جلانے کی اپیل کی ہے۔ تھرور نے کہا کہ وزیر اعظم کی تقریر میں مستقبل کی کوئی بصارت نہیں ہے۔
تھرور نے ٹوئٹ کیا، ’’پردھان شومین کو سنیئے، ان کے بوجھ، ان کی مالی فکر کو دور کرنے کے لئے ان کے پاس کچھ نہیں ہے۔ مستقبل کے برے میں کوئی بصیرت نہیں کہ لاک ڈاؤن ختم ہونے بعد وہ کیا فیصلہ لینے جا رہے ہیں۔ ہندوستان کے ’فوٹو-آپ‘ وزیر اعطم نے صرف ’فیل گُڈ‘ کا ماحول بنایا۔
