نئی دہلی: کانگریس کے پی ایل پونيا نے منگل کے روز راجیہ سبھا میں کہا کہ پردھان منتری آیو شمان بھارت اسکیم میں بھاری مالی بے ضابطگیاں ہو رہی ہیں، جس کی وسیع پیمانے پرجانچ کرائی جانی چاہئے۔ پونيا نے ایوان میں وقفہ صفر کے دوران یہ معاملہ اٹھاتے ہوئے کہا کہ آیوشمان بھارت میں اسپتالوں کے ساتھ مل کر کچھ لوگ مالی بے ضابطگیاں کر رہے ہیں۔ جس میں غیر مستحق لوگوں کے آیوشمان کارڈ بنائے جا رہے ہیں، اور اسپتال کے ساتھ مل کر سرکاری پیسہ لیا جا رہا ہے۔ ایک ہی شخص کے دو دو کارڈ بنائے جا رہے ہیں، اور ایک ہی وقت میں وہ دو اسپتالوں میں داخل ہوتے ہیں، اور دونوں اسپتال حکومت سے پیسہ لے رہے ہیں۔ انہوں نے کہا کہ حکومت کو ایسی بے ضابطگیوں کو روکنے کے لئے جانچ کرانی چاہئے اور سخت اقدامات کرنے چاہئے ۔ ایم ڈی ایم کے وائیكو نے کہا کہ چنئی میں سپریم کورٹ کی بینچ قائم کی جانی چاہئے۔ اس سے جنوبی ہندوستان کے لوگوں کو انصاف حاصل کرنے آسانی ہوگی۔ بیجو جنتا دل کے پرشانت نندا نے کہا کہ کسانوں کی آمدنی دگنی کرنے کے لئے باغبانی اور نقد فصلوں پر زور دینا چاہئے۔ اس سے پانی کی کم کھپت ہوگی اور زرعی لاگت میں کمی آئے گی۔
