چنڈی گڑھ(ایس این بی): سنیکت کسان مورچہ کی ایک اہم میٹنگ چنڈی گڑھ میں ہوئی۔ جس میں ملک بھر کی کئی ریاستوں کے کسان لیڈروں نے شرکت کی۔ 14 مارچ کو کسان دہلی کے رام لیلا میدان میں ایک مہاپنچایت منعقد کریں گے۔ 26 فروری کو ملک بھر کے کسانوں نے ٹریکٹر مارچ کرنے کا فیصلہ کیا ہے۔ کسان لیڈر جوگندر سنگھ اوگراہاں نے کہا کہ 23فروری کو کسان ملک بھر میں مرکزی وزیر داخلہ امت شاہ، ہریانہ کے وزیر اعلیٰ منوہر لال اور وزیر داخلہ انل وج کے پتلے جلائیں گے۔
کسان رہنماؤں نے نوجوان کسان شوبھاکرن سنگھ کی موت پر غم کا اظہار کیا اور انہیں خراج عقیدت پیش کیا، جو کھنوری سرحد پر اپنی جان گنوا بیٹھے تھے۔ کسان رہنماؤں نے کہا کہ کسان تنظیمیں ملک بھر میں یوم سیاہ اور غصے کی صورت میں احتجاج کریں گی۔ کسان لیڈر بلبیر سنگھ راجیوال نے کہا کہ ہریانہ پولیس نے پنجاب سرحد پر کارروائی کی ہے۔ انہوں نے ہریانہ پولیس کے خلاف دفعہ 302 کے تحت مقدمہ درج کرنے کا مطالبہ کیا۔ انہوں نے کہا کہ اس معاملے کی عدالتی تحقیقات ہونی چاہیے۔
انہوں نے ہریانہ کے وزیر اعلیٰ اور وزیر داخلہ کے خلاف مقدمہ درج کرنے کا بھی مطالبہ کیا۔ سنیکت کسان مورچہ نے متاثرہ خاندان کے لیے ایک کروڑ روپے کی مالی امداد کا بھی مطالبہ کیا ہے۔ 14 مارچ کو ملک بھر کے کسان دہلی کے رام لیلا میدان میں کسان مہاپنچایت منعقد کریں گے۔ یہ فیصلہ سنیکت کسان مورچہ نے میٹنگ میں لیا ہے۔ اور 26 فروری کو کسانوں نے ٹریکٹر مارچ کا اعلان کیا ہے۔ کسان لیڈر راکیش ٹکیت نے کہا کہ 26 فروری کو کسان پورے ملک کی شاہراہوں پر ٹریکٹر مارچ کریں گے۔ ایک طرف سڑک کھلی رہے گی۔ اسی دن شام کو ورلڈ ٹریڈ آرگنائزیشن (ڈبلیو ٹی او) کا پتلہ بھی جلایا جائے گا۔
یہ بھی پڑھیں: منی پور ہائی کورٹ نے میتی کمیونٹی کو ایس ٹی میں شامل کرنے کے 2023 کے اپنے حکم کو منسوخ کر دیا
سنیکت کسان مورچہ نے ملک کے وزیر داخلہ امت شاہ، ہریانہ کے وزیر اعلیٰ منوہر لال اور وزیر داخلہ انل وج کے استعفیٰ کا بھی مطالبہ کیا۔ کسانوں نے ورلڈ ٹریڈ آرگنائزیشن سے زراعت کو الگ کرنے کا مطالبہ کیا ہے۔
